Khliehriat, Jylliew 11: Ka Jaiñtia National Council (JNC) lyngba ka Employment Commission kaba dei ka tnad treikam kaba peitngor ïa ka jingkyrduh kam kyrduh jam jong ki khun samla ka thaiñ, hynne ka sngi Balang ka la leit ban ïakynduh markhmat ïa u manager jong kawei ka petrol pump Indian oil kaba don ha ka shnong Mookhep, lad Jalyiah, East Jaiñtia Hills ban dawa thungkam ïa ki khun samla kiba dei ki trai muluk.
Kane ka sienjam ba la shim da ka seng ka long ruh shibynta ban ïarap lem ia ki khun samla kum ha kane ka pyrthei kyrduh kam kyrduh jam bad khnang ba kan long ka jingmyntoi kaba khraw na ka bynta ki khun samla.
Ka seng hapoh ka jingïalam jong u bah Nangjan Dkhar Vice President ka JNC-CEC ryngkat bad ki nongïalam shnong jong ka Shnong Mookhep u Ma V. Siangshai ki la leit ban ïakren bad utei u manager u M.Rathore bad ha ka jingïakren bad u, u la kular ban shimkhia halor katei ka kam bad kular ban thung ïa arngut ki samla naduh kaba sdang jong une u bnai ban wan.U la pynpaw ruh ba na ka liang ka jong ki, ki long kaba kloi ban ïatreilang bad ka seng khamtam bad ki bor shnong.
Na ka liang ka seng ka pynpaw ka jingsngewkhia kaba jur namar ka jingkyrduh kam hapdeng kiba bun ki khun samla bad ka kyntu ruh ïa ki nongseng kam la ki dei ki petrol pump ne kiwei kiwei ki kam karkhana ki dei ban plielad ïa ki khun samla kiba dei ki trai muluk.
