Nongpoh, Jylliew 11: Ka ophis u District Social Welfare Officer ka Ri Bhoi District ha ryngkat ka jingïatreilang bad ka ophis u Deputy Commissioner bad ka District Hub for Empowerment of Women, mynta ka sngi ki la pynlait paidbah ïa ka skhim Nasha Mukt Bharat Abhiyan ha ka jingïalang kaba long ha Parish Hall, Nongpoh.
U Deputy Commissioner ka Ri Bhoi, u Abhilash Baranwal, u la plie paidbah ïa kane ka skhim kaba dei ka thong ba kyrpang jong ka sorkar kmie ban pynlong ïa ka ri kaba lait na u drok bad ban ïakhun pyrshah ïa ka jingktah jong u ha ki shnong bad sor.
La sakhi lang ha katei ka sngi da ki heh sorkar kum ka Dr. Angel Kharduid, DMHO ka Ri Bhoi, ka Kong N.F. Sun, District Social Welfare Officer, ka Kong K.B. Jyrwa, DSEO, u Bah B. Suchiang ba mihkhmat na ka tnad Pulit bad ruh da ki khynnah skul, ki nonghikai bad kiwei ki paidbah.
Ka jingthmu jong ka Nasha Mukt Bharat Abhiyan kaba dei ka skhim bala wanrah daka Ministry of Social Justice & Empowerment ka long ban pynlong ïa ka imlang sahlang kaba lait na ka jingdih drok ha ka jylla bad ka ri baroh kawei.
Ha kane ka sngi, la pynlong ruh ïa ka signature campaign kaba la shim bynta da ki khynnah skul ban pyni ïa ka jingkyrshan bad ka jingïatrei lang ban tehlakam ïa ka jingpyndonkam be-aiñ ïa u drok ha ka District.
Ki nongkren ha ka jingïalang ki la pynpaw ban rat diengkhong ïa utei u jait jingdih donkam ka jingïatreilang na baroh ki liang naduh ki bor sorkar, ki nongïalam shnong, ki longkmie longkpa, ki khynnah, bad ki nongshong shnong ban ïakhun pyrshah bad ban pynduhjait ïa utei u jait jingdih buaid u ba la ktah shikatdei ïa ka imlang ka sahlang.
