Shillong, Jylliew 05: U Johnwell G Momin u la kylla long uwei na ki khyndiat ngut ki coach ha ka jingïalehkai golf bad uba nyngkong eh ban ïoh ïa ka jingpynskhem kum u coach na Meghalaya hadien ba u la ïoh ïa ka C certification na ka National Golf Academy of India ha u bnai ba la dep.
ïa kane ka prokram ai jinghikai (Course) la pynlong ha Poona Golf Club naduh ka 12 tarik haduh 17 tarik Jymmang, ha kaba u Johnwell G Momin u la ïoh 22 mark na ka 30 marks ha ka Practical Exam bad 54 na ka 70 ha ka Theory Exam.
Ban ïoh ïa ka jingpynskhem kum u Coach u Johnwell G Momin u la hap ban pynïar ïa ka jingtip jong u shaphang kane ka jingïalehkai, ha kiei kiei baroh naduh ka rukom khih jong ka bol golf, ki 14 tylli ki nongrim da kumno ban tied ïa ka bol bad ki kyndon kiba bun jong kane ka jingïalehkai.
“Ka jingtip kam kut bad Nga khmih lynti ban pule shuh shuh,” u la ong, da kaba bynrap ba ki jingthmu jong u na ka bynta ka lawei ki kynthup ban don la ka jong ka skul bad ban pynrung ïa kane ka jingïalehkai golf ha ki jaka pule.
Hynrei ka Golf ka dei ka jingïalehkai kaba rem dor ha ka liang ki tiar bad kiwei kiwei ki jingdonkam. Kum u tnga bad u kpa, u Johnwell G Momin u hap ban pynïahap ïa ki jingdawa jong ka golf bad ka jingpynbiang ïa ka ïing ka sem jong u.
U don bun ngut ki briew kiba u la ai khublei kiba la ïarap bad kyrshan ïa u ban ïoh ïa ka C certification, khamtam eh ïa U Blei, ïa ka tnga bad ka khun jong u, ki kmie ki kpa bad kiwei kiwei ki bahaïing hasem. U la ai nam ruh ïa kane ka jingjop jong u sha u Chesrang A Sangma uba la khlad noh, uba la tip kyrteng kum u Changchang u rangbah ba ieid bad sngewtynnat ïa ka Sports uba la khlad noh ha une u snem.
U Johnwell G Momin u la ai khublei ruh ïa u Myntri Rangbah ka Jylla u Conrad K Sangma, bad ïa u MLA barim u James PK Sangma, MLA u Bah Alexander Laloo Hek, u MP ka Tura u Saleng A Sangma bad ïa u Billykid A Sangma. Kumjuh ruh um shym la klet ban ai khublei ïa u Dr Debajit Rudra Sangma, ka Tura Golfers Association bad kumjuh ruh ïa u Hector Marwein uba dei u Director ba dei peit ïa ka madan Shillong Golf Course.
