Na ka daw ka jinglong ka suiñbneng, ym pat thikna bha ka jingsam bording ha jylla, ong u Mondal

Shillong, Jymmang 30: U Myntri ka tnat Bording u AT Mondal u la ong ba ka jinglong jingman jong ka jingsam bording ha ka jylla kam pat long kaba thikna bha na ka daw jong ka jinglong ka suiñbneng.
Haba kren sha ki lad pathai khubor ha ka sngi Thohdieng u Mondal u la ong ba bun ki jaka ki la ngat sha ki jingshah pynthut ka jingsam bording ha kaba ïadei bad ka 132/33 KV line, 33/11 KV line bad 11 KV line sha ki substation na ka daw jong ka jingjur palat u slap ba khlem sangeh, ka jingkhyllem ki dieng bad ki tnat dieng.
“Ki briew jong ngi ki la don ha ka kam bad ngi dang pyrshang ban maramot ïa kine kham kloi katba lah,” u la bynrap.
Katkum ka jingong jong u, kam pat shym la don satia kano kano ka jingjulor kaba jur haduh mynta kumba la ïathuh da ki heh ophisar.
U Mondal u la pyntip ruh ba u dang shudep ban khot ka jingïalang bad u commissioner & secretary in-charge power bad ka tnat ka dang khmih bniah halor kine ki jinglong jingman.
“Ki briew jong ngi ki dang don ha ka kam bad ngi pyrshang katba lah ban maramot ïa ki jingjulor khamkloi katba lah tat haduh ba ka jinglong ka suiñbneng kan long kaba la biang bad bha.”
Shuh shuh u Myntri u la kyntu ïa ki paidbah ban kiar na ki conductor naba ki lah ban julor bad bthei kynsan na ka daw jong ka jingkyllem ki dieng ne ki tnat diang ha ki jaka kiba tlot.