Twa khyndew bun jaka, thut ka leit ka wan ha ki thaiñ Ranikor bad ha kiwei de ki jaka

Mawkyrwat, Jylliew 20: Hadien ka jingwan jong u slap uba jur tang ha kine ki khyndiat sngi ka la ktah shibun ïa ka leit ka wan jong ki paidbah hapoh jong ka South West Khasi Hills District ne wat hapoh jong ka jylla Meghalaya baroh kawei ha kaba la sakhi ba ka jingtwa khyndew ne jingshah rong um ki surok ka la jia ha manla ki jaka.
Lah ban kdew ba da ka jingwan jong u slap uba jur, haba phai ha ki thaiñ Ranikor C&CD Block shibun ki jingjia kiba la wanrah ruh ki jingsngewsih namar ka la don ruh ka katto katne ka jingduhnoh wat ïa ka mynsiem briew na ka daw jong ka jingtwa bad shah tap khyndew ki ïing ba ki shong ki sah. Halor kine kiei kiei na ka liang jong u bah Pius Marweiñ uba dei kum u MLA/MDC jong ka Ranikor Constituency u la ïathuh ba ki la don ki jingtwa khyndew ha ki surok na Mawsynram sha Ranikor bad kumjuh ruh na Mawkyrwat sha Ranikor, na Ranikor sha ki jaka khapud kum ha ki thaiñ Nongjri, Rajaju, Nongkulang bad kiwei de ki jaka ki la shah ktah na ka jingtwa khyndew ki surok bad ym tang ha ki jingtwa bad hap ki khyndew ha surok ka la jia ruh ba bun ki ïing sah jong ki briew ruh ki la shah tyllep noh ha ka um saw.
U la pynpaw ruh ba haduh mynta ym pat lah ban tip ba haduh katno tylli ki ïing hapoh jong ka Ranikor Constituency ki la shah ktah hynrei kiba u la ïoh jingtip ki long ha shnong Koraibari, Gillagora, Maheskhola.
U Bah Pius Marweiñ kum u nongmihkhmat u la pynpaw ba u don eh ka mynsien ban ïarap ne leh ei ei ha kum kane ka por hynrei tang namar ba ym don lad ha ka ïaid ka ïeng lyngba ki kali ma u ruh u la shem jingeh, hynrei u kyrmen ba lada ka bneng ka ai lad un sa leh ïa kaba donkam ban ai ki lad jingïarap.