Paw ka dak jingtwa sa ha surok NH-6 ha Kuliang bad Ratacherra

Khliehriat jylliew 19: Ka long kaei kaei kaba sngew khia haduh katta katta ba kiba bun ki bynta jong ka surok ha ka thaiñ Narpuh mynta ki la sdang ban pyni shuh shuh ki dak ban twa bad don ruh ki bynta kiba la twa, ki bynta kiba la paw ka dak jingtwa ki dei ha ka surok bah ha Kuliang bad ha Ratacherra, kane ka la buh jingsyier bad buh jingma ïa ki paidbah.
Nalor ka jingtwa ki lum, jingtwa ka khyndew, mynta ka sngi ha ka por kumba 1 baje mynsngi, ka la twa biang ki maw kiba heh ha ka thaiñ Sonapur ha jan ka Tunel bad kah ïa ka surok ka lynti ha kaba wat ki kali rit ruh kim lah shuh ban ïaid, ki nongtrei jong ka National Highway Authority of India, mardor ki la shim khia ban pynkhuid ïa ki maw ki dieng kiba la kah lynti ïa ka surok ïaid kali ha ka Tunel ha Sonapyrdi bad ki la ialeh katba lah ban pynkhuid ban dup lah ban iaid tang ki kali rit ruh.
Ki thymmei khubor ki ïathuh ba ka jingtwa ki maw ha katei ka bynta ha jan Tunel, ka dei na ka daw ka jingther jur palat u slap na kata ka daw ka khyndew bad ki maw ki shu hap bad tyllun beit nalor ki lum, donbok ba kam shym la don kano kano ka jingjia ba sngewsih ha kane ka jingtwa ki maw ha jan ka tunel.
Kumban shu pynkynmaw, ki bor synshar district bad ki bor pulit jong ka East Jaiñtia Hills District, ki la dep buh ka jingmana bad kyntu ïa ki nongleit nongwan ba ki dei ban long kiba peitngor bad ïaid adkar bha haba ki ïaid lyngba na ka surok national highway 6, East Jaiñtia Hills District namar ym lah satia ban tip ha kano ma ka por ka jingtwa ki lum, jingtwa ki maw ka lah ban jia na ka daw ka jingther jur palat u slap.
Katkum ka hukum ba la dep pynmih da u District Magistrate, la khang pyrshah ïa ki kali khamtam ki kali heh ba kim dei ban ïaid na kane ka surok, bad ki kali rit ruh ki lah ban ïaid sa tang lada don ki kam ki bym lah shuh ban kiar bad ki kali ki dei ba ïaid tang ka jing khia kaba tang hapoh ka 3 ton bad ki dei ban da long peitngor bha haba ki ïaid na kane ka surok.