Nongpoh, Jylliew 19: Kum ka jingtynrong lem ïaki longiing ba duk haka thaiñ Umsiang bad Umlaper jong ka Mawhati Constituency, u Bah Dasakhiatbha Lamare MLA ka Mawhati ba dei ruh u myntri ka tnad transport, hynnin ka sngi u la leit ban sam da ki tin sopiing sha kumba 200 tylli ki longiing ba duk ba rangli ha katei ka thaiñ bala mang kyrpang lyngba ka skhim SRWP.
Ha katei ka sngi ka jingleit sam ïa kitei ki tin sop iing sha ki paidbah haka thaiñ Umsiang bad Umlaper la don ryngkat ruh da u Bah RM Mukhim, Working President ka NPP Mawhati, u Bah Donboklang Kharnaior, General Secretary ka NPP Mawhati, u Bah Shemphang Lyngdoh lem bad kiwei ki riew rangbah katei ka thaiñ.
Naka liang u Bah Dasakhiatbha Lamare u la pynpaw ba kum u MLA jong ka thaiñ u la don ka jingangnud bala slem ban sam tin sha ki paidbah ha katei ka thaiñ bala dep pynmang kyrpang lyngba ka skhim SRWP naka bynta ka jingmyntoi ki paidbah ba duk ba rangli ba kin ioh ban maramot ïaki iing ki sem ban lait naka sngi u slap.
