Na ka Urban Affairs yn pan jaka na bynta ka Captain Williamson Sangma State University

Shillong, Jymmang 12 : U Myntri ka tnad pule puthi ka jylla u Rakkam A Sangma ha ka sngi Nyngkong u la pyntip ba ka tnad ka la thoh sha ka tnad Urban Affairs na ka bynta ka Captain Williamson Sangma State University. Haba kren sha ki lad pathai khubor, u Myntri u la ong, “Ha kaba ïadei bad ka State University, ngi la pynkhreh ha baroh ki liang. Ki kolej kiba la aplai ban ïasoh ki la sdang ban shim admission.”
U ong ruh ba katba ka tnad ka dang ap ban ïoh ïa ka jaka na ka bynta ka permanent Shillong campus, ka tnad ka dang wad mynta ban ïoh ïa ka ophis treikam kaba shipor na bynta ka Shillong campus jong ka State University. “Ngi la dei ban pyndonkam ïa ka Bijini Complex ha Laitumkhrah hynrei ka NEHU ka la rah ïa kane ka kam sha ka High Court da kaba tuklar ïa ka jinglong trai ïa ka Bijini Complex. Kumta, ai ba ka Kashari kan rai shwa ïa kane ka kam,” la ong u Sangma.