Hiar jurip u Bah Pius ryngkat u EE bad SDO ka PWD (R) ïa ka surok ha Twah Ringai, Ngunraw

Mawkyrwat, Jylliew 19: U MLA/MDC ka Ranikor Constituency, bah Pius Marweiñ ha ka 18 tarik u Jylliew, 2022 ha ryngkat u Executive Engineer bad Sub Division Officer, ka PWD (Roads), Mawkyrwat Division da ka jingsngew-khia ki la hiar ban jurip ïa ka jingtwa jong ka surok ha Twah Ringai ka lynti ban leit sha shnong Ngunraw, South West Khasi Hills District.
U bah Pius Marweiñ haba kren ha ki lad pathai khubor u la ong ba u Nongmihkhmat jong ki paidbah ka dong ka thaiñ da ka mynsiem jong ka jingsngewkhia bad sngewsynei halor kane ka jingjia, hadien ba u la ïoh jingpyntip ïa kane ka jingjia um shym la pynslem hynrei mynta ka sngi ka 18 tarik u Jylliew, 2022 u la leit ban jurip da lade ban peit bad kumno ban pynthaw ki lad ki lynti kumno ban leh khnang ba ki paidbah kin nym ïa kynduh jingeh ha ka leit ka wan la ka long ha ka kit ka bah khamta eh ha ka pang ka shitom namar ymdon da kawei pat ka lynti ban leit na shilliang sha shilliang lait noh lada pynshna da ka lynti ïaid kjat kaba shi por khnang ba kin ïoh ban pyndonkam.
U la ong ruh ba kum kine ki jingjia ki la jia mynta ha manla ki jaka bad ki don ruh ki jaka ki mat ïa ki jingsngewsih ba ki duh noh ïa kiba ha ïing ne ïa ki mynsiem briew. Namarkata, u la buh ka jingkyrpad ïa ki paidbah ba ha kum kine ki sngi ba don ka jingjur jong u slap ki dei ïa long husiar ha ka leit ka wan kaba manla ka sngi namar ym lah ban tip ha kano ma ka por kin jia kum kine ki jingtwa khyndew.
Ha kaba ïadei bad kane ka jingtwa jong ka surok ha Twah Ringai (Ngunraw), u bah Pius u ai ka jingkyrmen ïa ki paidbah jong ka shnong ba da ka jingshimkhia jong u ryngkat bad ka tnad PWD (Roads) kin sa ïoh ban pyntrei noh nangne shakhmat khnang ba ki paidbah kin nym ïa kynduh jingeh ha ka leit ka wan kaba manla ka sngi.
Katba ha ka jingkren jong u bah Dmingland Thongni, Rangbah Shnong Ngunraw u la pynpaw ka jingaikhublei na ka bynta ki nongmihkhmat jong ka dong ka thaiñ kata ïa u bah Renikton Lyngdoh Tongkhar, Myntri ka tnad Umbam Umdih jong ka Jylla bad kumjuh ruh ïa u bah Pius Marweiñ kiba la ïaleh shitom ban poi bad wan jurip ïa kane ka jaka. “Kyrmen ba da ka jingwan jong ki ban jurip kin sa lah ban pynurlong ban pynwad ne thaw ki lad ki lynti ban shna noh da kawei ka surok ne ai da ka jingkieng”, ong u bah Thongni.
Ha kajuh ka por u la ai khublei ruh na ka bynta ki paidbah jong ka shnong Ngunraw baroh kawei ba hadien ka jingai jingtip ban ïamih paidbah ban shna ïa ka lynti ïaid kjat ba shipor tang ban ïoh ban pyndon-kam ha kaba kit ba bah ïa ki jingdonkam namar haduh mynta ban ïaid kali na kane ka surok kan long shuh bad ban ïaid da ka kjat na kata ka jaka ba twa ka dang shim por haduh shiteng kynta ei ei ban poi haduh shnong Ngunraw, ong Rangbah Shnong. Namarkata, u la buh ruh ka jingkyrpad na ka bynta ki nongmihkhmat bad kumjuh ruh ïa ka ophis jong ka PWD (Roads) ba kin sngewbha ban ïaleh shitom bad ban kham pynstet ïa ka kam khnang ba ki paidbah jong ka shnong kin nym ïa kynduh jingeh.
Ha kane ka sngi la ïa don lang u Executive Engineer ka PWD Roads, u bah David M. Pyngrope, u SDO ka PWD Roads, bah S.I. Laso lem bad ki paidbah jong ka shnong kiba la ïamih ban shna ïa ka lynti kjat.