Kner jingiarap ki pulit EJHD bad ki nongtrei karkhana dewbilat sha ki lanot ba sahkut jingdheng kali ha ka surok NH-6 ha East Jaiñtia Hills

Khliehriat jylliew 19: Da ki hajar ngut ki briew kiba dei ki nongñiah bad ki nongbud trok, ki night supper bos bad ki ningleit nongwan ki dang sahkut ha ka jingdheng kali kaba jur bha ha surok national highway-6 ha ki thaiñ Narpuh, East Jaiñtia Hills District kaba na ka daw ka jingtwa ka surok, ha kaba ki bor district mynta ki la mana ban ïaid na kane ka surok.
Ki pulilt jong ka Lumshnong Police Station, ki pulit jong ka Umkiang Patroling Post lem bad ki nongtrei jong ka Meghalaya Cement Ltd, Goldstone Cement, Dalmia Cement Ltd naduh hynnin ka sngi ki la kner ki kti ban ïarap ïa ki lanot kiba dang sahkut ha katei ka jingdheng kali kaba jur kaba ha ka thaiñ Narpuh East Jaiñtia Hills District, ki la ai sngewbha da ki jingbam, ki biskit, ka um ban dih bad kiwei kiwei ki jait jingbam kum ka ja sngi ne ka jingbam sngi ïa ki lanot bad kane ka la long ka jingmyntoi ïa bad jingiarap ïa ki lanot ha kaba ki la lait na ka jingiap thngan ha surok.
Na ka liang u President jong ka All Jaintia Hills Cement factorty Association, u R.K.Pareek, u la iathuh ba ka Topcem Company kaba ju tip kum ka Meghalaya Cement Ltd ka la leit ban ai da ka jingbam sngi ïa ki lanot kiba sahkut ha ka jingdheng kali, kumjuh ruh u S.B, Sahoo, u nongtrei jong ka Goldstone, u la ong ba ka company ka la sam da ki um, biskit bad ki jingbam sngi sha ki lanot.
Wat hapdeng ka jingbunkam ban peitngor ïa ka jingbit jingbiang ha ka thaiñ, ki pulit jong ka Lumshnong Police Station bad ki pulit jong ka Umkiang P.P ki la lah ban ai ïa ka por jong ki ban sam jingbam bad sam um sha ki lanot kiba dang sahkut ha surok ha ka jingdheng kali kaba jur bha ha ka thaiñ Narpuh.