Shillong, ïaïong, 05: Ki shlem pule ba la pynïaid da ka Balang Catholic ha ka Jyllaniambah Shillong bad Jyllaniam Jowai kin khang khyrdep ha ka sngi Thohdieng kum ka dak ka jingsngewsih halor ka jingkhladnoh jong u Pope Francis.
U Auxiliary Bishop jong ka Jyllaniambah Shillong u Most Rev. Bernard Laloo u la phah ïa ka shithi sha baroh ki bor pynïaid jong ki shlem pule Catholic ban pyntip sha ka tnat Pule Puthi ka Sorkar Jylla halor ka jingkhang khyrdep ïa ki skul bad kolej bad ki jaka ai jinghikai.
“Ngi don ha ka por jong ka jingsngewsih bad ka jingjaw ummaw namar ka jingkhlad noh jong u Kpa Bakhuid baieid jong ngi, u Pope Francis. Kum ka dak jong ka jingburom jong ngi ïa u khliehduh bad u nongmihkhmat jong u Petrus Bakhuid, nga kyrpad ïa baroh ki jaka pule jong ka Balang Katholik ba kin khang ha ka sngi Thohdieng,” u la ong ha ka shithi.
Ha Jyllaniam Jowai, u Most Rev. Ferdinand Dkhar ha ka shithi ba la phah sha ki Lyngdoh, ki riewniam bad ki paidriewngeit,u la bthah ïa ki skul ba la pynïaid da ka Balang kin khang ha ka sngi Thohdieng bad la kyrpad ba kin ïashim bynta ha ka Mass Bakhuid na ka bynta ka jingjahthait ka mynsiem ba la khladnoh jong u Pope Francis ka ban long ha ka por 4 baje janmiet ha Cathedral Parish, Jowai.
