Nongpoh, Ïaïong 19: Na ka bynta ban tehsong bad ban wan rah ïa ka jingïatylli hapoh ka Kur Mallai ha Ri Bhoi District, ka Seng Kur Mallai na Ri Bhoi District ha ka sienjam kaba nyngkong eh ka la pynlong da ka jingïakynduh paidbah jong ka kur na ka bynta ban ïa tai ne ban ïa thir kumno ban dang saiñdur ïa ka bha ka miat jong ka kur ka jait Mallai ha Ri Bhoi District.
Ïa kane ka jingïalang la pynlong ha Maryland Resort Umsawnongkharai, ha kaba la wan ban shim bynta da u Bah Sanbor Shullai, MLA ka South Shillong kum u kongsan. La sakhi lang ruh ha kane ka sngi naduh ka jingdon lang u Adviser ka Kur Mallai na Ri Bhoi u Bah Thomas Roy Mallai, u President ka Kur, u Bah S. Mallai, ka Kong B. Mallai kum ka Longkmie ka kur bad kynthup kiwei kiwei ki nongïalam kur bad ryngkat ki dkhot ka kur na kylleng ka them Ri Bhoi. Ïa kane ka jingïalang jong ka seng kur Mallai la pynïaid da u Bah Kerbok Mallai, Secretary ka Seng Kur Mallai na Ri Bhoi District.
Ha kane ka jingïalang, wat la ka dei ka sien ba nyngkong eh jong ka jingïakynduh ki Kur Mallai ha Ri Bhoi, hynrei na ka liang ka Seng Kur Mallai ka la shim ruh ïa ka sienjam ban pynkup burom ïa ki riew pawkhmat ka kur, kata naduh kiba la don ha ka kyrdan engineer, ki nonghkai, ki samla ba pass bha ha ki examination, ki samla kiba leit sha ka kam jong u Blei la ki long ki phadar, ki sister, ki pastor, ki tymmen basan bad ruh ha ki bynta bapher bapher ba ki dkhot na ka Kur Mallai ki la wan rah burom ïa ka kur Mallai bad ka jaid bynriew hi baroh kawei.
Ha kane ka jingïalang la ai jingkren ruh da ki nongïalam ka Kur Mallai ba kynthup naduh u Bah Thomas Roy Mallai, u Bah Arland Mallai, u Bah Serephim Mallai bad ka Kong B. Mallai, ha kaba ki la kyntu ban wan rah ïa ka jingïatylli hapoh ka kur. Ki phang ba ki la kren ha kane ka sngi ki kynthup naduh ka kam ram u kñi ha ka kur, ka kam ram ka Longkmie ha ka kur, ka karam ki nongïalam ka kur ha ka shongkha ka shongman bad ban don kata ka jingïathylli kumno ban tehsong ïa ka kur ka jaid khnang ba ka kur ka jaid kan nang kiew irat ha baroh ki liang jong ka jingim.
Haba kren ruh ha kane ka sngi, u Bah Sanbor Shullai, u la ai khublei ïa ka seng kur Mallai na Ri Bhoi kiba la pynlong kum kane ka jingïakynnduh lang hapoh ka kur. Kane ka jingïakynduh lang ka long shisha kaba donkam na ka bynta ban tehsong bad ban wan rah ïa ka jingïatylli hapoh ka kur, ha kaba kum ka kur ka hap ban don ka jingïatrei lang na ka bynta ban kyntiew ka longkur ka long jaid, u la ong.
Kum u longkmie ka Kur Shullai bad kiba dang ïa dei shi kur bad ka kur Mallai, u Bah Sanbor Shullai u la kyntu ruh ïa ka kur Shullai ba kim dei ban don kata ka jingïapher hapoh ka kur bad ban pynkhlain ïa ka kur ka jaid ki donkam ka jingïatrei lang bad ban pyneh pynsah ïa ka jaid ka khong, namar haba khlain ka long kur ka long jaid ka khlaiñ ruh ka longkur ka long jaid.
Shuh shuh, ha kane ka sngi, kumba la pynkup burom ïa ki dkhot ka kur kiba la wan rah burom ïa ka kur ha ka kyrdan bapher bapher, u Bah Sanbor Shullai u la kyntu bad pynshlur ruh ba na ka kur Mallai ki dei ban mih ruh ki MDC bad ki MLA ki ban ïalam ïa ka jaid bynriew.
