Nongpoh, Ïaiong, 18: Hadien bun bnai ka jingap khmih lynti jong ki paidbah lano ban sdang noh ïaka jingpyntrei bad shna ïa u surok Nongpoh-Umden-Sonapur, khatduh khatwai ki puh shilum kila wan poi ban sdang tih ïaka surok na Nongpoh sha Umden kaba jngai kumba 20km eiei.
Kum ban shu pynkynmaw ba dang ha ki khyndiat taiew u myntri rangbah ka jylla u Conrad K Sangma dalade hi u la ïohmad ïaka jingsohsot jong katei ka lynti kaba ki paidbah jong bun tylli ki shnong ki hap ban ïaid man ka sngi, ha kaba u myntri rangbah u la kular ba tang ha ki khyndiat taiew yn sdang noh ïaka kam bad ka long shisha ka jingkmen ïa kiba bun ki paidbah ba katei ka kam mynta kala sdang ban ïaid shaid shaid ban tih pynbeit bad ban pynheh ïaki katto katne ki bynta kiba donkam.
Kumba long mynta ka jingsdang ban shna ïaka surok kan long shuwa na Nongpoh sha Umden bala mang kumba 49.53 klur lyngba ka State Scheme bad kaba sah kan long na Umden sha Sonapur lyngba ka PMGSY.
Kiba bun hi naki paidbah naka thaiñ Umden kila pynpaw ka jingkmen kaba khraw hadien bala sdang ka jingpyntrei ïa katei ka surok, ban long ruh ka jingkyrkhu ïaki phew tylli ki shnong khamtam, ban kyntiew ïaka ïoh ka kot, ka roi ka par, ka leit ka wan naduh ka pang ka shitom, kiba beh trei bad kumjuh ruh beh sha ki jaka pule.
Kiba bun ruh ki paidbah ki la pynpaw ïa ka jingsngewkmen bad ha kajuh ka por ki khmih lynti ruh ba ka sorkar lyngba ka tnad PWD kan pyndep noh kham kloi ne ban pynsted ïa ka kam, khnang ban lah ban pyndep kloi ïa une u surok ban pynsuk ïa ki paidbah ha ka leit ka wan.
