Shillong, Ïaïong 18: Ha kano kano ka jaka tang shu kren shaphang u phan saw bad ka tungtap baroh kin kynmaw beit ïa ka You & I Cafe, ka dukan bam phan kaba pawnam bha ha ka nongbah kaba don ha Mawlai Mawroh.
Kane ka jaka bam ka khring ym tang ïa ki samla hynrei ïa kiba la noh ka rta ban kwah leit mad bam phan bad tungtap ryngkat ki jait jhur ba harukom.
Kaba pynbyrngia eh ïa ki nongleit bam ka dei ba ki ïoh ruh ban post pat ïa ki dur bam phan ha ki rynsan social media la ka long ha facebook instagram bad ruh ha ki youtube.
Nalor u phan saw bad tung tap kane ka dukan ka buh ruh ïa ka jaka, ki jait doh babun bad kiwei kiwei
U Mawphor haba buddien ïa ka jingshakri jong kane ka dukan, la ïoh jingtip ruh ba kane ka dukan bam ka la kylla long kum ka ïing ba ki paidbah ki wan ban bam kdang man ka por khamtam eh ïa kito kiba wan shi Ïing shi sem.
U trai jong kane ka dukan Bah Wanphai Nongrum u la ïathuh ba ha ki 9 snem ka jingïaid lynti, kane ka dukan bam ka la ïoh ïa ka jingshaniah na kiba bun kiba haduh mynta mynne na kylleng ki wan ban mad ïa ka jingbam tynrai kaba ki Khasi ki sngewtynnad bha ban bam kum u phan saw bad tungtap.
Ha ka kyntien ai mynsiem ïa ki samla kiba kwah ban seng kam lajong, na ka liang u trai ka You & I Cafe u la ong, “Ngim dei ban sheptieng ban Seng ïa kano kano ka kam, dei ban kut jingmut bad ban pyrkhat jngai ryngkat ka jingminot ha ka kam, phin sa ïoh ïa ka jingjop.”
U ong ruh ba kum ki samla ki dei ban skhem ka jingmut khlem kynran dien bad ong ruh ba kum ki samla ba thrang seng kam lajong ki dei ban wad ki lad lynti na ki skhim ba ka sorkar ka ai bad plie lad ban seng ïa ki kam lajong.
