Nongpoh, Ïaïong 15: Ki Pulit ka Ri Bhoi ha ka jingïalam u heh Pulit ka Ri Bhoi, u V.S Rathore ha ka miet jong ka sngi Baar ki la pynlong ïa ka jingtalasi bad khynra naphang ïa ki kali paidbah ha Nongpoh na ka bynta ban tehlakam ïa ki kam sniew bad ruh ban tehlakam ïa kito ki kali ba pynkheiñ aiñ.
Ïa kane ka jingkynra la pynlong ha ki bynta jong ka surokbah National Highway-6, pyrshah bad ka ophis u Deputy Commissioner ka Ri Bhoi, ha kaba ki heh Pulit bad ki pulit ki la bat naphang ïa ki kali paidbah ban talasi bad tohkit khnang ban lap ïa kiba pynkheiñ aiñ bad kiba leh ïa ki kam sniew.
Haba kren sha ki lad pathai khubor, u Senior Superintendent of Police ka Ri Bhoi, u V.S Rathore, u la ïathuh kane ka jingtalasi ïa ki kali la ju pynlong na ka por sha ka por bad ban pyrkhing ïa ki kali la pynlong biang ïa kane ka jingkhynra khnang ban lap ïa kiba pynkheiñ ain bad kiba leh ïa ki kam sniew.
U la ong ruh kane ka jingtalasi ïa ki Kali ka don bun ki jingthmu naduh ka jingtehlakam ïa ki kam tuh kali ha kane ka surokbah, ka jingpyrkhing ïa kiba shalan beain ïa u Drok, ka jingpyrkhing ïa kiba Nong Bangladesh kiba wan rung beaiñ sha kane ka jylla, ha ka la sakhi ha ki lad pathai khubor ba ki Pulit ka Ri Bhoi ki ïa trei shitom ban tehalakam ïa ki kam sniew.
U la ong ruh kane ka jingtalasi ïa ki kali kan ïarap shibun ban tehlam ïa ki kam sniew kum ka jingrahbor ïa ki kynthei ki khynnah bad kiwei kiwei ki kam sniew, ha kaba la ju ïoh ban bat ïa kiba leh kam sniew.
Shuh shuh, u la ong ruh na ka liang ka tnad Pulit na Ri Bhoi kan dang bteng ïa kane ka jingkhynran bad talasi ïa ki kali paidbah ban tehlakam ïa kiba pynkheiñ aiñ bad ka tnad Pulit na Ri Bhoi ka la rai ban pynkhlaiñ ruh ïa ki VDP ha manla ki shnong ha Ri Bhoi bad da ka jingïatrei lang yn sa lah ban rat dyngkhong ïa ki kam sniew kiba ktah ïa ka imlang ka sahlang bad ruh ban pynduna ïa ka jingjia ba sngewsih na ka jingpynkheiñ ïa ki aiñ ñiah kali ha kane ka surokbah ha Ri Bhoi.
