Ki Syiem, ki Sordar bad ka District Council ki dei ban pyrkhing jingwan ki briew ba nabar : FKJGP

Mawkyrwat, Ïaïong 14 : Ka FKJGP jong ka South East Khasi Border Circle hapoh ka jingialam u Samla Kyrmen Shangdiar ka la leit khynrah Trading Lisence ha ki ïew thaiñ Border jong ka thaiñ Sonatola, Nongkriah haduh ka ïew Balat bad ka seng ka la lap ruh ba don ki briew ba nabar ka jylla kiba wan naduh Uttar Pradesh bad Bihar ki ïoh ban rung ban mih laitluid sha ki thaiñ nongkyndon ban khaïi pateng, kane kan buh jingeh ïa ki paidbah jong ka thaiñ ban kyntiew ïa ka ïoh ka kot namar ka jingïoh rung bad ïoh ïaid mon ki briew nabar ka jylla ban knieh ïa ka khaïi pateng.
Kumta, u President ka seng u la kyntu jur ïa ki bor dei peit naduh ki Syiem ki Sordar, bad ïa ka District Council ba kan pyrkhing bha bad ban teh-la-kam ruh ban nym ai shuh ïa ki ban ïoh Trading Lisence khnang ba ki briew jong ngi kin ïoh ban seng ïa ki kam kiba lah ban trei.
Ka seng ka la ïoh ruh ban aiti ha ka Mawsynram PS bad Dangar Out Post ïa ki briew ba wan nabar ban shim jingtohkit ne bishar bad ban leh ïa kaba donkam khnang ba kum kine kin nym jia shuh ha ka dong ka thaiñ.
Ka kyrwoh na ka seng ka long ba lada ki bor pynïaid kim lah ban teh lakam ïa kum kine ki kam ka seng hi kan sa shim ïa kiwei pat ki synjam ban leh lada ka dang lap ba kum kine ki dang jia.