Shillong, Iaiong 14: Hadien ba ka KSU ka la dep ïa kynduh ïa i MP ka Shillong Parliamentary Constituency, i Dr. Ricky A. J. Syngkon ha ka 10 tarik u Ïaïong 2025, mynne ka sngi ka 14 tarik u Ïaïong 2025, ka seng ka la ïoh ban ïa kynduh sa ïa u MP ka Tura Parliamentary Constituency, u Saleng Sangma ha ïingsah jong u ha ka por 12 baje mynsngi. Ha ka jingïalam u Samla Lambokstarwell Marngar (President) ha ryngkat ka jingïadonlang u Samla Donald V. Thabah (General Secretary), Samla Biangbor L. Paliar (Vice President), Samla Reuben Najiar (Assistant General Secretary), Samla Raymond Kharjana (Organising Secretary) bad Samla Alerick Kharjana (Assistant Office Secretary), ka KSU ka la pynsngew sha u Saleng Sangma ïa ki kynrum kynram ha ka rukom thungkam ha NEIGRIHMS hapoh ka jingpynïaid u Director u Dr. Nalin Mehta bad kyrpad na u MP ba un sngewbha ban pynpeit ïa kine ki kynrum kynram bad ba ka rukom thungkam ka dei ban ïaid katkum ki jingai jingmut ka seng khnang ba ki samla wad kam ka jylla kin ïoh jingmyntoi.
Napdeng shibun tylli ki mat ba ka seng ka la ïoh ban syllok bad u MP, ka KSU ka la kdew kham bniah halor saw tylli ki mat kaba ka sngew ba dei ban pynkylla bad pynwandur na ka bynta ka jingmyntoi kiba bun balang bad khamtam ïa ki riewlum ba dei na Meghalaya. Ka KSU ka la ban ba ka jingthungkam ha ka Nursing dei ban mang da ka bhah ba 80:20 kaba mut 80 na ka 100 dei ban ai ïa ki kynthei bad 20 na ka 100 dei ban mang ïa ki shynrang. Wat la u Director ka NEIGRIHMS u la kob ba ym ju don kum kata ka kyndon ban mang 80:20 ha ka kam Nursing hynrei ka KSU ka don ki sakhi sabut ba kiwei ki hospital sorkar pdeng kum ka AIIMS bad kiwei kiwei ki pyntreikam ïa kum katei ka rukom bhah kam.
Shuh shuh ka Governing Council jong ka NEIGRIHMS ka don ka iktiar ban pyntreikam ïa katei ka kyndon ha NEIGRIHMS. Ka KSU ka sngew ba ka jingbym don katei ka kyndon bhah 80:20 ka wanrah jingeh shibun ïa ki nongpang bad nongtrei ha NEIGRIHMS bad kane lah ban sakhi ha kaba kiba bun mynta ki nurse ha NEIGRIHMS ki dei ki shynrang kiba dang shu shah thungkam shen bad jan baroh kine ki wan na ka jylla Rajasthan kaba wanrah ïa ka jingkylli ba kumno kine ki nong Rajasthan ki ïoh suk ban trei ha NEIGRIHMS. Shuh shuh ka jingbym ïa pei ha ka ktien ka thylliej hapdeng kine ki nurse shynrang na Rajasthan bad ki nongpang ka wanrah jingeh shibun ïa ki nongshah sumar ha NEIGRIHMS.
Kaba ar ba ka KSU ka la pynsngew ha u MP ka long halor ka jingpynhiar ïa ka rta ki nongthep kam na ka 35 sha ka 30 ka ban khanglad ïa shibun ngut kiba thmu ban thep kam ha NEIGRIHMS. Ka seng ka sngew ba dei ban pynneh beit ïa ka rta khanglad ha ka 35 snem.
Kaba lai ka long halor ka jingduna ka bhah na ka bynta ki riew trai jylla (Scheduled Tribes) bad ka seng ka sngew ba dei ban kyntiew shuh shuh ïa ka bhah na ka bynta ki riewlum namar ha jylla Meghalaya 85 na ka 100 ki dei ki riewlum.
Kaba saw ba ka KSU ka la pynsngew ka dei halor ka jingbuh ïa ki jaka ïaleh eksamin ka NEIGRIHMS shabar jong ka jylla ha kaba ki jaka ki bun ki long kiba jngai bad kane ka pynduh lad ïa shibun ki nongïaleh eksamin khamtam kito kiba wan na ki longïing ba duna ka ïoh ka kot. Mynshem snem ka KSU ka la leit ban tuklar halor kane ka jingbuh ïa kita ki examination centres shaduh sha Jorhat, Kolkata, Delhi bad kiwei kiwei ki jaka ba sha jngai bad u Director u la kular ba ha u snem ba bud un pyrshang ban buh noh ïa ki examination centres hapoh Meghalaya.
Mynshem snem ha kane ka jingïakren ki nongïalam ka seng bad u Director, ki dkhot ka seng ki la pynsngew ba ka jingbuh ïa ki centres sha jngai kan ktah ïa kiba bun ki nongthep kam hynrei u Director u la kynthoh kylla pynban ïa ki nongmihkhmat ka jylla da kaba ong ba lada por ilekshon ki lah ban pynlut pisa ban pynbiang kali por ïalap ilekshon ne ïaid rally ki dei ruh ban pynbiang kali ïa ki nongthep kam ha NEIGRIHMS kiba ngat ban ïaleh eksamin shabar jylla.
Na ka liang u Saleng Sangma hadien ba u la ïohsngew ïa ki jingujor ka seng, u la kular ba un shimkhia 100 na ka 100 ban pyrshang pynurlong ïa kitei ki jingujor ka seng. U la pyntip ruh ba u la pyrshang ban ïa kynduh ïa u Dr. Nalin Mehta ha kine ki khyndiat sngi hynrei une u Director u la shim shuti haduh 20 tarik u Ïaïong 2025 kaba dei ruh ka sngi ba khatduh ban plie ïa ka jingthep kam.
Ka KSU ka sngew ba kane ka jingshim shuti u Director haduh katei ka sngi ka dei ka jingleh shutia jong u ban lait ban ai jubab lane ban hap pynbeit ïa ki kynrum kynram halor ki kyndon thungkam ka NEIGRIHMS ha shwa ka 20 tarik u Ïaïong. Ka jingleh arsap utei u Director ka la pynbor ïa u Saleng Sangma ban ïasyllok mar mar bad u Dr. Ricky AJ Syngkon bad kine ki ar ngut ki MP ka jylla ki la rai ban pynsngew noh mardor sha u Union Minister of Health ka ri India bad ban dawa ïa u ba u dei ban tuklar halor ki jyrwit jyrwat ka thungkam ha NEIGRIHMS.
Na ka liang kine ki arngut ki MP ruh ki la pynsngew ba lada ym lah ban pynbeit ïa kitei ki kynrum kynram dei ban pynjlan shwa ïa ka advertisement ka NEIGRIHMS bad kin ym ailad ïa ki kam buit tuh utei u Director uba la phet bak na jylla ban lait ïa pynbeit ïa kitei ki kynrum kynram kiba ktah matïong ïa ka jylla baroh kawei.
Khatduh, ka KSU ka kwah ban pynpaw paidbah ïa ka jingthok jingshukor u Director ka NEIGRIHMS da kaba u pynmih khubor ba ka thungkam thungjam hapoh NEIGRIHMS ka ïaid katkum ki riti treikam ka Department of Personnel & Training (DoPT) jong ka sorkar pdeng. Ka seng ha ka por ba ka ïa kynduh ïa utei u Director ka la kdew ïa ka jingbym beit ka roster register, ka jingbym biang ki backlog vacancies, hynrei u Director um shym la lah ban pynshai ïa kitei ki jingduna. Wat ha ka shithi ba jubab ïa ka KSU ka NEIGRIHMS kam shym la lah ban pynshai halor kitei ki mat. Ka KSU ka sngew ba lehse une u briew u thmu ban wanrah beit da ki briew lajong ban trei hapoh NEIGRIHMS.
Ka KSU ka ïoh jingtip ruh ba u Nalin Mehta u ju pyntieng ïa ki nongtrei ha NEIGRIHMS ba kim bit ban kren pyrshah ïa u ïoh kan ktah ïa kam ka jam jong ki hi. Ka KSU ka sngew ba ka sorkar jylla kam dei ban leh Pontius Pilatus ha kane ka kam namar ba wat lada ka NEIGRIHMS ka dei ka shlem jong ka sorkar pdeng hynrei ka don pat hapoh jylla Meghalaya bad ka sorkar jylla ka don hok ban tuklar ha katei ka shlem lada don kano kano ka kynrum kynram khamtam kaba ktah ïa trai jylla namar kiba bun hi kiba leit sumar ha katei ka shlem ai jingsumar ki dei kiba na Meghalaya, ong ka kyrwoh khubor ba la pyllait da ka Information & Publicity Cell ka Khasi Students Union.
