Shillong, Ïaiong 14 : U Symbud Myntri Rangbah ka Jylla ba peit ïa ka tnad Urban Affairs, Bah Sniawbhalang Dhar ha ka sngi Nyngkong u la pyntip ba ka sorkar jylla shen kan sa mang pisa na ka bynta ban shna biang ïa ki surok ha ki jaka sor.
Haba kren bad ki lad pathai khubor, u Bah Sniawbhalang u la pyntip ba ïa ka Detailed Project Report (DPR) la dep ban phah sha ka tnad Public Works Department (PWD) hadien ba ka sorkar jylla kala rai ban pynsangeh noh ban shna ïa ka smart road lyngba ka smart city project.
Katkum ka jingïathuh jong u, la shem ba kane ka projek ym lah satia ban pyntreikam namar kiba bun ki daw.
“Kumta, ngi la rai ban sangeh noh ïa kane ka projek bad wanrah bad tyrwa biang noh da kawei pat kaba thymmai na ka tnad PWD Road. Ngi dang thmu ban mang pisa noh bad kumta hapoh une u snem ngin sa ïoh noh ïa ki surok kiba bha,” bynrap biang u Symbud Myntri Rangbah.
Haba jubab halor ka jingkylli, u Bah Sniawbhalang u la pyntip ruh ba ka PWD ka la peit bad bishar bniah ïa baroh ki jaka ba lang um bad kumta mynta ki dang don ha ka kam kumno ban weng ïa kane.
