Nongpoh, Ïaiong 12: Ha kawei ka jingjia aksiden, kawei ka samla kaba trei ruh kum ka officiating Staff Nurse ha Nongpoh Civil Hospital ka la duh noh syndon ïala ka jong ka jingim hadien ba ka Alto kaba ka shong ka la leit ban tynrah nadien kawei ka trok kaba dang ïaid ha surok NH 6 Umsning By Pass kaba hap haka shnong Lumumpih, Ri-Bhoi District.
Katkum ka jingtip bala ioh lum na ki pulit, la ong ba kane ka jingjia ka la jia haka miet jong ka 11 tarik Ïaiong haka por kumba 11 baje eiei mynmiet, ha kaba kawei ka Alto kaba don ïa u number OR 02 AG 7804 bala ñiah da u Chirub L Nonglait (27) na Iewrynghep Mawlai, ryngkat bad ka Samla Phyllashisha Lynser (25) na Umbir Lawsyiem, Ri-Bhoi District ki dang hiar sha ka thaiñ Nongpoh, hynrei ynda poi ha katei ka jaka u nongñiah katei ka Alto u la tynrah nadien jong kawei ka trok kaba dang ïaid kaba don ïa u number ML 10 C 0234 haduh ba kin da sahkut hapoh katei kali.
Ki paidbah kiba sakhi ïa katei ka jingjia ryngkat ki bor pulit jong ka Umsning Police Station, ki la leit ban ïarap sei ïa u nongñiah katei ka Alto, bad pynkit mar mar sha Umsning CHC, katba ka samla Phyllashisha Lynser ka la sahkut hapoh katei ka kali ryngkat ka jingmynsaw na ki bynta jong ka khlieh, bad ki pulit ki sa lah ban sei ïa katei ka samla napoh katei kali tad haduh ban da poi ka kali khwai, bad pynkit mar mar sha Umsning CHC hynrei ki doctor ki la pynbna ba katei ka samla ka la khlad shuwa ban poi sha Hospital bad rah noh sha jaka buh metiap ha Nongpoh Civil Hospital.
Hadien katei ka jingjia, ïa u samla Chirub L Nonglait ba ñiah ïa katei ka Alto la pynkit noh sha Civil Hospital Shillong ban ioh ka jingsumar ba kham paka namar ka jingmynsaw kaba la kham jur, bad ka jingtohkit halor katei ka jingjia ka dangïaid shakhmat.
