Pynliem ka Meghalaya ïa ka Manipur, yn ïaknieh nam lahduh bad ka Sikkim

SHILLONG, ïaïong 11: Ka Meghalaya ka la ïalehkai bha ban pynliem ïa ka Manipur da tang 8 ron ha ka jingïakhun semifinal kaba itynnat bad kaba ïakhaid bha jong ka 2nd NECDC Senior Women Tournament 2025 ha Rangpo, Sikkim, ha ka sngi Thohdieng.
Hadien ba ka la buh ïa ka thong da 109/7, ka Meghalaya ka la lah ban khanglad ïa ka liang pyrshah tang na bynta 101/7 ha kane ka jingïalehkai T20.
Kane ka jingïakhun la buh ban long hynnin ka sngi Palei hynrei la pynkynriah noh namar ba jur palat u slap. Ka Meghalaya mynta ka sngi kan aireng pyrshah ïa ka Jylla ba pdiang pynlong ïa kane ka lympung kaba bat ruh ïa ka burom lahduh, ka Sikkim, kaba la jop ïa ka semifinal jong ka pyrshah ïa ka Nagaland, na bynta ka nam lahduh.
ïa kane ka lympung la pynïaid da ka North East Cricket Development Council bad la pynlong da ka Sikkim Cricket Association.
Haba phai sha ka jingïakhun, ka Manipur ka jop ïa ka jingkynting pisa (toss) bad aiti ïa ka Meghalaya ban tied nyngkong. Ka Luiza Tamang ka la lamkhmat da kaba kamai 42 ron na ki 49 tylli ki bol, ka inning kaba kynthup ïa san tylli ki saw ron (four) bad kawei ka six. Ka la ïoh ïa ka jingkyrshan kaba thikna na ka Daiaka Emigale Warjri, kaba la nohsynñiang 24 ron na ki 27 tylli ki bol, katba ka Neha Hajong bad ka Indariakor K Wanniang baroh arngut ki la khyllem noh tang na bynta 11 ron.
Hynrei ka Manipur ka la ïai bteng ban pyndkut ïa ki jingïatreilang, ha kaba ka 38 ron kaba la kamai hapdeng ka Luiza bad ka Daiaka na ka bynta ka wiket kaba saw ka dei ka jingïatreilang kaba heh tam. Na ka bynta ka Manipur, ka kapten ka RK Linthoingambi Devi, ka Monica Devi Ningthoujam bad ka Ranjita Devi Koijam ki la khur mar ar wiket.
Haba jubab, ka Seterny Devi Brahmacharimayum ka la lamkhmat ha ka tied da kaba kamai 36 ron na ki 45 bol hynrei ka Meghalaya ka la long kaba seisoh bha ban ap pahara. Ka Rubi Chettri ka la khur 2/14 bad baroh san ngut kiwei pat ki wiket jong ka Manipur ki la shah pynhap lyngba ka run out.
Ha ka over kaba khatduh, ka Manipur ka la donkam 13 ban jop bad kamai saw ron na ki lai tylli ki bol ba nyngkong. Hynrei ka Monica Singh ka la kawang lai tylli ki dot bol marïabud ban pynthikna ïa ka jingjop na bynta ka Meghalaya. Ka Rubi, kaba la don bynta ha kawei ka run out, ka la khur ïa ka nam Player of the Match.
Da kane ka jingjop, ka Meghalaya kan jam sha ka final ha kaba kan ïakhun pyrshah ïa ka Sikkim, kaba kum ma ki ka dei ka kynhun kaba khlem shah rem ha kane ka lympung. Ka jingïalehkai final kan sdang naduh ka por 9 shiteng mynstep ha ka sngi Saitjaiñ bad ïa kane ka jingïalehkai yn pyni live lyngba ka YouTube Channel jong ka Sikkim Cricket Association bad ha ka CricHeroes app.