Nongpoh, Ïaïong 10: San ngut ki mynder Bangladeshi ki la ngat ha ka shrip jong ki Pulit ka Ri Bhoi hadien ba ki la pyrshang ban rung tuh shapoh India da kam ba ki dei ki nong India bad pyndonkam pat da ki kot thok ban pynshisha ba ki dei ki nong India khamtam da ka Adhar Card ba la shu shna thok.
Kine ki san ngut kiba la ngat ha ka jingpynap shrip jong ki Pulit ka Ri Bhoi ki kynthup ïa u Sahin Akhtar (31 snem), Mozibor Rahman (42 snem), Prasanto Das (26 snem), Suma Akhtar (27 snem), bad u Mamadur Rahman (32 snem). La ïoh bat ïa kine ki san ngut ki mynder Bangladeshi ha ka jingpynap shrip jong ki Pulit ha ka surokbah NH-6 ha Mawtnum hajan ka Petrol Pump bad pyrshah ka Excelencia Restaurant katba ki dang shong ha kawei ka kali kaba don ïa u number AS01SC-4410.
Ki Pulit ka Ri Bhoi ki la pyntip, hadien ba la bat ïa ka kali ki la pan ïa ki kot ki sla ban pynshisha ba ki dei ki nong India bad tang ar ngut nadpeng ki san ngut kiba la pyni ïa ki kot ki sla da kaba kam ba ki dei u Sahin Khan na Bommasandra, Bengaluru, Karnataka, u Rony Khan na Ashok Puram, Bangalore North. Ki lai ngut pat ba kynthup ïa u Prasanto Das, u Suma Akhtar, bad u Mahmadul Rahman kim shym la don satia ki kot ki sla bad ki la pynithuh ïalade tang da ka kyrteng jong ki.
La ong ruh ha ka jingtohkit la lap ïa ki kot ki sla bad khamtam ka Adhar Card ba ki dei ki kot kiba shu shna thok suda bad ym shym la lah ban pynshisha lyngba ka UIDAI, ha kaba la suba jur ba ba kim don kano kano ka jingpynshisha ba ki dei ki nong India.
La ïathuh ruh hadien ba la tohkit la rah noh ïa ki sha Nongpoh Police Station na ka bynta ka jingtohkit kaba kham bniah bad dei ha ka jingtohkit ba ki san ngut ki la kam ïalade ba ki dei na ka ri Bangladesh bad ki la shu rung tuh sha India.
U Senior Superintendent of Police ka Ri Bhoi u V.S Rathore, u la ïathuh ba ha ka jingtohkit ki san ngut ki la phla ba ki la rung tuh sha India lyngba ka Cheragaon, Shella, khlem da don ki kot ki sla. Ki la siew ruh T. 16,000 ïa uwei u briew ba la tip kum u Hussain bad ba ju khot u Tunu Miah ha kaba u la synran ïa ki ha kawei ka jaka shuwa ba kin wan da ka kali sha nongbah Shillong.
U la ïathuh ruh, ba u nongñiah uba la pynpoi ïa ki sha Shillong u la telephone ïa u nongñiah jong ka Kali kaba don ïa u number AS01SC-4410, uba la ïalam ïa ki sha 101 Area Upper Shillong. Kine kiba la shah kem ki la phla ruh ba uwei u briew uba kim pat tip kyrteng un sa ap ïa ki ha Guwahati Railway Station bad na Guwahati kin sa leit sha Tamil Nadu bad Gujarat.
Shuh shuh u heh Pulit ka Ri Bhoi, u la ong ba haduh mynta ki dang pynlong ïa ka jingtohkit kaba bniah ïa ki ngut khnang ban ïohkem sa ïa kiwei kiba donkti ban pynrung tuh ïa ki mynder na ka ri Bangladesh sha ka ri India.
