Ka long ka ba donbok tam ïa ka Garo Hills, Meghalaya bad Assam ba ka sorkar India ka la tei ïa ka jingkieng surok kaba jrong bad jlan bha kaba 20 kilo metre kaba pynïasoh na Phulbari, Meghalaya sha Dhubri, Assam lyngba ka wah bah Brahmaputra. Ynda la dep tei (pun) ïa kane ka jingkieng ïa ka jingjngai ka surok kaba 242 kilo metre yn pynlyngkot noh tang 20 km bad ka por ïaid lynti kan long noh tang shiteng kynta ha ka jaka 7 kynta. Nangta la jan bha ban poi ha Siliguri ne kiwei kiwei ki jaka ha North Bengal. Kane ka mut la pynsuk ka leit ka wan jong ki briew bad ka kit ka bah jong ki mar ki mata baroh, ka plie lad plie lynti ïa ki ïew ki hat bad ka kamai kajih ruh kan ïaid bha bad kan ïarap shibun ha ki dor ki mur. Ym tang katta, ka plie lad ïa bun bah ki bynta jong ka Garo Hills kaba dang shem shitom ha ka leit ka wan ban ïaid kyllaiñ lyngba bun jaka jong ka Assam ba sharum. Kane ka mut kan wanrah ïa ka jingkylla bak-ly-bak ha ka ïoh ka kot bad kiwei kiwei ki bynta jong ka jingim jinglong bad jingtrei jingktah jong ki briew.
La sdang tei ïa kane ka jingkieng surok da ka Kompani ka ba heh ha Ri India, ka LARSEN & TURBO LTD, kaba paw nam bha na ka bynta ki jingtei kiba heh (Mega Builders). La mang ban pynlut T.33 hajar klur ba la bei tyngka da ka Kompani na Japan ka JICA lyngba ka sorkar India Ministry of Transport and Highways. Hadien ba la ïoh ïa ka Work Order (WO) ka Kompani LARSEN & TURBO ka la sdang ïa ki jingpynkhreh pynkhrum (premobilisation works) kum ban pynkhuid bad khrud ïa ki jaka (namar ka dei ka jaka shlei um) da kaba pun ïa ki jingkieng nar ban kit ïa ki mashin bad ki kali kit tiar kit tar, ka dewbilat, shyiap, ki nar rod bad kiwei kiwei kiba har rukom, ban tih thliew, pynïeng ïa ki païa ba radbah bad babun rukom, ban pynïeng ïa ki maw païa, ki kynroh dewbilat heh bad ki slab ker kynroh bad kumta ter ter. La sdang ïa kine ki jnit ki jnat baroh shuwa ban tei nongrim ïa ka jingkieng ha ka 15 tarik u Nohprah 2020 bad la mang ban tei dep ïa ka jingkieng ha u Nailur, 2028 don katto katne ki engineer kiba ong kan shimpor haduh 7 snem 9 bnai.
La pyntrei ïa ki nongtrei baroh kumba 3500 ngut naduh ki nongtrei rit kyrdan haduh kita ki High Level Engineer kiba don kumba 297 ngut ei ei. Yn don kumba 199 tylli ki païa bah naduh Phulbari Meghalaya haduh Dhubri Assam. 100 tylli ki païa ramhah kiba kyrshan ïa ka jingkieng surok ha ki bynta ba hapdeng ka wahbah bajyliew ka Brahmaputra. 59 tylli na ki, ki don ha Dhubri Assam, 38 tylli don ha Phulbari Assam bad tang 2 tylli ki don ha Phulbari Meghalaya. Ka jingjngai uwei na uwei u paia ka long 11 metre hynrei don pat kiba ïa jngai 60 haduh 125 metre katkum ka desain (design) jong ki engineer bad arkhitek (architect). Ka jingkieng ka don 6 lynti ki laiñ ïaid kali (6 lanes), kawei na ka bynta ki shipai, kawei na ka bynta ka health emergency (kyrkieh ban kit nongpang sha ki hospital) kata 4 tylli ki laiñ surok (4 lanes) yn ïaid (drive) ki riew paidbah.
