Ki paidbah ki la lah ban ïoh ïa ka birth bad death certificate tang na ophis u BDO : DC Ri Bhoi
Nongpoh,Ïaïong 09: Ka long ka khubor kaba ai jingmyntoi shisha sha ki paidbah ka Ri Bhoi District, ha kaba da ka jingiohi jngai u Deputy Commissioner bad ka bor synshar District Ri Bhoi, ki paidbah ka dong Ri Bhoi kin suk haba ki donkam ïa ka Birth bad death Certificate bad kim donkam shuh ban wan shaduh sha Nongpoh kaba dei ka Head Quarter ka District ha kaba tang na ki ophis u Block Development Officer kin ioh ïa ki birth bad death Cirtificate.
Haba kren sha ki nongthoh khubor, u Deputy Commissioner ka Ri Bhoi, u Abhilash Baranwal, u la ong ba kum u khliehduh ka District u la ai bor ïa ki BDO, kiba dei ruh ki Magistrate ba kin ai ïa ka order na ka bytna ban ioh ïa ka birth bad death certificate tang ha ka ophis u Block Development Officer kiba don ha Ri Bhoi District.
U la ong ruh la pynkup bor ïa ki ba kin ai ïa ka order ha kaba ïa dei bad ka Birth bad Death Certificate ka dei katkum ka Registration of Births and Deaths Act, 1969 (Central Act No.18 of 1960) and the Meghalaya Registration of Births and Deaths rules, 1999., ha kaba lada ki la ioh ïa ka order na ki ophis ki BDO, ki lah pat ban leit sha ki PHC ne CHC ban shim ïa ka birth ne death certificate.
U la ïathuh ruh ba ïa kane ka kam la shim khia da ka bor synshar District na ka bynta ban pynsuk ïa kiba bun ki paidbah na ki shnong nongkyndong ba kim donkam shuh ban leit sha Nongpoh bad lyngba ki ophis jong ki BDO ki la lah ban ioh ïa ki birth bad death certificate hadien ba la ioh ïa ka order na u Magistrate na ki Blcok bad ki lah pat ban leit shim ïa ki certificate sha ki PHC bad CHC.
Shuh shuh, u la pyntip ruh la shim khia ïa kane kam na ka bynta ka birth bad death certificate ha ki Block Office ka long ban pynsuk kham bha ïa ki pidbah, namar ha ki snem ba la leit noh kiba bun ki nongkyndong na ki shnong ba na jngai ki hap ban wan shaduh sha Nongpoh bad da kaba leh kumne kan ïarap ïa ki ba kim donkam ban pynlut bun ïa ka por bad ka ïarap ruh ban pynduh ïa ka jinglut jingsep ki paidbah, u la bynrap.