Bat ka FKJGP ïa ki trok kit Coke ha surokbah Ngai-lang ba ki ïaid sahuh mynsngi

Mawkyrwat, Ïaïong, 08: Ki nongïalam jong ka Federation of Khasi Jaiñtia & Garo People (FKJGP) South East Khasi Border Circle hapoh ka jingïalam jong u President Bah Kyrmen Shangdiar hynnin ka Lah Sngi u Blei ki la bat ïa ki trok kit Coke kiba ïaid ha ka por mynsngi ha ka surokbah, ha Ngai-lang, kaba don marjan ka shnong Mawrapat kaba hap hapoh ka Hima Malai Sohmat Syiemship.
Ki dkhot ka seng ki la bat ïa kine ki trok kit Coke hadien ba la aiti da ki jingthoh sha ki bor synshar District ban sngap lem ïa ki jingud bad jingpynsngew jong ki paidbah ïa ka jingeh halor ka surok na Weiloi shaduh Balat haduh jingkieng Umpung.
Hadien ba la ïoh pdiang ïa ki jingkyrpad ban pynsangeh ïaid trok kit Coke ha ka por mynsngi namarba ka la ktah ïa ka ïaid ka ïeng jong ki paidbah khamtam ïa ki kali kiba kit ïa ki nongpang kaba la pynsohsat namar ka jingsniew bad ka jingrit ka surok khamtam ha kum kane ka por ba dang ïaid shait shait ka jingpynbha ïa ka surok.
Ha u kyrwoh, ka FKJGP South East Khasi Border Circle lyngba u Bah Kyrmen Shangdiar ka la ong ba lada ki bor synshar District kim peit lem ka seng kan sa shim ïa kiwei pat ki sienjam ban leh na ka bynta ka jingmyntoi jong ki paidbah nongshong shnong jong ka thaiñ Mawsynram baroh kawei.