Shillong, Ïaïong 08: U chief secretary barim ka sorkar jylla u Bah PS Thangkhiew ula shah thung kum u chairman jong ka Meghalaya Farmers Empowerment Commission (MFEC).
Ïa kane ka jingthugkam ïa u la pynskhem da ka jingïalang ka kynhun Myntri kaba la long ha ka sngi baar kaba la pynïaid da u Myntri Rangbah ka jylla u Conrad K Sangma hadien ka jingiehnoh kam jong chairman barim ka commission.
“Chairman barim u la iehnoh kam halor ki daw shimet bad kumta kane ka kam ka la thylli bad kumta la buh da ka committee bad kane ka committee ka la ai jingmut ban thung ïa u chief secretary barim u Bah P S Thangkhiew bad dei halor kane ba ka cabinet ka la pynskhem ïa ka kyrteng jong u kum u chairman jong ka Meghalaya Farmers Empowerment Commission,” ïathuh u Myntri Rangbah ka jylla.
