SHILLONG, ïaïong 06: Ki khynnah bad samla ïalehkai jong ka Laban Sports Club Table Tennis Academy [LSCTTA] ki la khur lut ïa ki takma ha baroh ki kyrdan ha ka lympung ïalehkai Table Tennis kaba la tip da ka 1st Satsang Vihar Table Tennis Tournament 2025 ba la pynlong da ka Satsang Vihar Shillong naduh ka 04 tarik haduh 05 tarik ïaïong, 2025.
ïa kane ka lympung ïalehkai Table Tennis kaba ar sngi lynter la pynlong ha Laban Sports Club Indoor Hall, Shillong, ha kaba 70 ngut ki khynnah ïalehkai ki la wan ban ïashim bynta. Ki jingïakhun la phiah ha ki lai tylli ki kyrdan na bynta baroh Shynrang bad Kynthei, kine ki kynthup ïa ka kyrdan ïakhun para marwei na bynta ki khynnah ba hapoh 12 bad 15 snem (Under-12 & Under-15 – Boys & Girls) bad ka kyrdan ïakhun para marwei jong kiba la san lane ka Men’s & Women’s Singles.
Ha ka Under-12 jong ki shynrang u Niyon Kashyap Das u la wan ba nyngkong, bud sa u Wangden Lama bad u Shivansh Pariyar ha ka kyrdan ba ar bad balai. Katba na ka liang ki kynthei ka Shriya Thapa ka la khur ïa ka nam lahduh bad ka Saachi Mizar ka la wan ba-ar.
Ha ka Under-15, u Debobrata Paul u la wan ba nyngkong, nangta u Ansh Ray bad u Dhruv Dey ki la wan ha ka kyrdan ba ar bad balai. Ka Shriya Thapa bad ka Saachi Mizar ki la jop biang ha ka kyrdan ïakhun Under-15.
Ha ka Women’s Single ka Shriya Thapa ka la jop ïa ka kyrdan ba nyngkong, katba ka Saachi Mizar ka la bud ha ka kyrdan ba ar, nangta ïa ka kyrdan ba lai la khur da ka Shraddha Chokhani.
Ha ka Men;s Single ïa ka kyrdan ba nyngkong la khur da u Debdoot Chatterjee, katba u Kapil Biswakarma u la wan ba-ar bud sa u Debobrata Paul ha ka kyrdan balai.
Nalor kine ki nongjop u Ethan Mark Marbaniang jong ka Laban Sports Club Table Tennis Academy u la khur ïa ka nam ‘Emerging Player Of The Tournament.
