New Delhi Ïaïong 04: Ka Cabinet Committee on Economic Affairs, kaba la pynïaid da u Myntri Rangbah duh Narendra Modi, ka la mynjur ïa saw tylli ki projek jong ka Tnad Rel ha kaba ka jinglut baroh kan long kumba T. 18,658 klur. Ki Saw tylli ki projek kiba kynthup 15 tylli ki District ha 3 tylli ki Jylla kata, ka Maharashtra, Odisha, bad Chhattisgarh kin pynkiew ïa ka rynsan ba la don lypa jong ka Indian Railways da kumba 1247 Kms.
Kine ki projek ki kynthup, Sambalpur – Jarapda 3rd bad 4th Line, Jharsuguda – Sason 3rd bad 4th Line, Kharsia – Naya Raipur – Parmalkasa 5th bad 6th Line , Gondia – Balharshah doubling.
Ka jingpynbun ïa ki lynti rel kan kyntiew ïa ka leit ka wan, kan ai ka jingtreikam kaba kham bha bad ka jingshakri kaba lah ban shaniah na ka bynta ka Indian Railways. Kine ki jingtyrwa ban pynbun ïa ki lynti rel kin pynsuk ïa ki jingtreikam bad pynduna ka jingkhapngiah, kyntiew ïa ki jingdon jingem ba donkam bha ha ki bynta kiba bun briew tam ha ka Indian Railways. Ki projek ki ïahap bad ka jingthmu jong u Myntri Rangbah duh Narendra Modiji ban ïoh ïa ka India bathymmai ka ban pynlong “Atmanirbhar” ïa ki briew jong kane ka thaiñ da ka lynti jong ka jingpynroi ba pura ha ka thaiñ ka ban kyntiew ïa ki lad ïoh kam / seng kam lajong.
Ki projek ki dei ka jingmih na ka PM-Gati Shakti National Master Plan na ka bynta ka jingpynïasoh ba bun rukom kiba urlong lyngba ka jingpynkhreh lang bad kan ai ka jingpynïasoh kaba khlem jingeh na ka bynta ka leit ka wan jong ki briew, ki mar ki mata bad ki jingshakri.
Lyngba kine ki projek yn shna 19 tylli ki Station bathymmai, ki ban kyntiew ïa ka jingpynïasoh sha ar tylli ki Aspirational District (Gadchiroli bad Rajnandgaon). Ka projek Multi-tracking kan kyntiew ïa ka jingpynïasoh sha ka kumba 3350 tylli ki shnong bad kumba 47.25 lak ngut ki nongshong shnong.
Ka Kharsia – Naya Raipur – Ka Parmal ka sa ka pynbiang ka jingpynïasoh sha ki jaka ba thymmai kum ka Baloda Bazar, kane kan plie lad ban seng ïa ki karkhana ba thymmai kynthup ïa ki karkhana dewbilat ha kane ka thaiñ.
Kine ki dei ki lynti kiba donkam na ka bynta jingkit ïa ki mar kum ki mar rep, ki sboh, u dewïong, ki nar, dewbilat, mawshun, bad kiwei kiwei. Ka jingkyntiew ïa ki kam kan wanrah ïa ka jingpynkit mar kaba kham heh kaba 88.77 MTPA (Million Ton ha ka shi snem). Ka Railways ka long ka lad pynkit mar ka bym da ktah ïa ka mariang bad kaba seisoh bha ha ka rukom pyndonkam ïa ka bording, kan ïarap ban pynurlong ïa ki thong ba ïadei bad ka jinglong ka suiñbneng ban pynduna ïa ka jinglut jingsep jong ka ri, pynduna ka jingwanrah umphniang nabar ri (95 Klur Litre) bad pynduna ka jingmih CO2 (477 Klur Kg) kaba ïaryngkat bad ka jingthung dieng kaba 19 Klur.
