Ka jingshlei ka wah Umtalen ka pynkordit ïa ki paidbah ka shnong Lum Tongseng-Narpuh

Khliehriat Jylliew 15: Ka shnong Lum Tongseng kaba don hapoh ka elaka Narpuh ka dei ka shnong kaba don surok khyndew kaba lah ban ïaid kali tang ha ka por tlang bym don slap tangba ka jingthut ka long tang namar bym don jingkieng ha ka wah Umtalen, ki nong shnong shnong jong ka thaiñ ki hap ban iaid da ka kjat na kawei ka jingkieng (hanging Bridge) kaba don ha ka wah Umtalen bad lada ki leit da ki pick up ruh ki hap ban iaid lyngba na ka wah Umtalen, ha kaba ka kali ka hap ban ñiom na um namar ym don jingkieng.
Mynta ki nong shnong shnong jong ka Llum Tongseng, ki kynduh jineh namar ka jingjur palat u slap ka wah Umtalen kaba don Marjan bad ka wah Lukha ka la shlei bad tap lut ïa katei ka jingkieng kaba ki ju ïaid kjat (hanging bridge) bad bad ki kali pick up khlwa ruh kim lait shuh ban iaid na ka wah Umtalen namar kane ka wan ruh ka um ka la heh palat bad buh jingma ïa ki kali ban ñiom na um.
U Waheh Shnong jong ka shnong Lum Tongseng, u ma Wonly Kyndoh bad u Secretary Shnong Lum Tongseng, u bah Ananias Suchiang, ki la pynpaw ka jingsngew khia halor ka jing bym don ki surok, ki lynti kiba bit ba biang ban poi sha shnong bad kane ka buh jineh ïa ki paidbah ha ka leit ka wan, ha ka kit ka bah khamtam haba wan lap ka pang ka shitom.
“ha ki por lyiur haba jia ka jingdap um ka wah Lukha, kane ka jingkieng ba ngi ju iaid kjat ruh ka la shah tap ha ka um bad ka buh jingma ïa ki paidbah ban ïaid ruh, kumjuh ruh lada ngi iaid na kawei pat ka lynti na Umtalen ruh ngim lah ban jam sha shiliang namar lah heh um palat, kumta bunsien ngi kynduh jingeh ha ka leit ka wan khamtam ha ka por ba jur slap” pynpaw u waheh shnong Lum Tongseng.
Na ka liang u Secretary Shnong Lum Tongseng, u bah Ananias Suchiang pat, u la pynpaw ka jingeh ha kaba pynpoi ïa ki mar rep sha ki jaka ïew, namar kane ka thaiñ ka dei ka jaka ba ki nong shong shnong ki ju rep bha ïa u kwai, u tymew, ki jait soh bad kiwei kiwei ki jait mar rep “ha ka por lyiur kumne ym ju don ki kali ki ban wan sha shnong, kumta ïa ki mar rep ngi hap ban kit hi da ka bor met bad iaid da ka kjat haduh kumba 40 minit ban pynpoi ïa ki mar rep jongngi ha surok national highway ha Lad Lum Tongseng kaba don ha surok NH ha Sonapur bad na Lad Lum Tongseng pat ngi pynkit noh da ki kali ban pynpoi ïa ki mar rep sah ki jaka ïew” ong u bah Suchiang.
Ha kaba iakren bad u mawphor, kitei ki nong synshar shnong jong ka shnong Lum Tongseng, ki pynpaw ruh ka jingsngew lyngngoh ïa ka jingleh klet ki bor synshar District jong ka East Jaiñtia Hills District, namar dang myn ha ki khyndiat snem, na ka liang u Deputy Commissioner, ki majistor ki la wan ban hiar jurip ïa ka wah Umtalen bad kular ruh ban shna noh da ka jingkieng ïaid kali ban pynsuk ïa ki paidbah ka thaiñ ha ka leit ka wan khamtam ha ka por lyiur ba jur slap, hynrei kane ka jingjurip jongki mynta ka la shu jah rngai noh bad la shu leh klet noh da ki bor synshar district.
Kum ban shu bynrap, kane ka jingleh klet ki bor synshar district bunsien ka ju pynlynga mynsiem ïa ki paidbah jong ka shnong Lum Tongseng bad ong ruh ba na ka liang ka Dorbar Shnong kan sa sdang ban bud dien noh ïa kane ka jing thmu ban shna jingkieng ïaid kali ha ka wah Umtalen.