Nongpoh, Jylliew 15: Namar ka jingdonkam palat ban kyntiew kyrdan noh ïaka Mawhati PHC kaba la hap ban ai jingshakri sha kiba bun tylli ki shnong ha katei ka thaiñ, ka Ri-Bhoi Youth Federation, Mawhati Circle kala rai ban pynbna syndon da ki jingïakhih haki taiew ban wan ban dawa naka sorkar ba ka dei ban kyntiew kyrdan noh ïa katei ka PHC sha ka CHC ba ki paidbah kin ioh ka jingshakri ba paka.
Naka liang u Bah Renol Dkhar President bad u Banrilang Makdoh Secretary, kila pynpaw ba naka liang ka seng kala dep ban phah ruh da ka jingthoh sha ka u Myntri ka tnad ka koit ka khiah, ha kaba naka liang jong u, u la kular ban shimkhia ban kyntiew kyrdan noh ïa katei ka PHC, hynrei haduh mynta ym I don dak eiei bala shu pynlong kamkai bad kular kai ïaki nongïalam ka seng.
Ki nongïalam ka RBYF kila kynthoh jur ruh ïa u MLA ka Mawhati baka jingshim sting bad ka jingbym shakri hok jong u ïaka kam ka wanrah jingeh ïaki paidbah jong ka thaiñ Mawhati bad dei na katei ka daw ba ka seng kam banse ban pynlong syndon da ka jingïakhih haki taiew ban wan, ban dawa naka sorkar ban kyntiew kyrdan noh ïaka Mawhati PHC khnang ba ki paidbah kin ioh ka jingshakri ba paka hakaba ïadei bad ka koit ka khiah.
Shuh shuh naka liang ka seng kala ioh ruh ki jingujor kiba bun naki paidbah ba ym ju don doctor ha katei ka PHC, ba u doctor ba dei peit u la shu ieh katba mon ïa katei ka jaka sumar, ha kaba la don tang u doctor Ayurvedic kaba la buh jingeh ïaki paidbah shikatdei ban leit phah sumar ha katei ka jaka sumar jong ka sorkar.
