Pynkup burom ka ophis DSO & ka DSPS EJH ïa ki samla ba khur takma na ka Meghalaya Games bad Inter-School Athletics

Khliehriat jylliew 14: Kum shibynta ban pynshlur ïa ki khynnah bad ki samla ba kin shimbynta ha ka jingialehkai sport, ka ophis jong ka District Sports Officer bad ka District Sport Promotion Society East Jaiñtia Hills District mynta ka sngi ka la pynkup burom ïa ki 44 ngut ki khynnah kiba la la leit ban iashim bynta ha ka sport bad mih khmat na ka district, kiba la ioh khur ïa ki medal ha kane ka Meghalaya Game 2022 bad ïa ki 18 ngut ki khynnah kiba mihkhmat ha ka State level Inter-School Athletics Meet 2022.
Ïa kito kiba ïoh ïa ki Gold Medal la ai da ka khung pisa kaba T5500 tyngka, ki ba ioh khur ïa ka Silver Medal la ai T 3300 tyngka bad kiba ioh khur ïa ka Bronze Medal ki ioh T 1700 tyngka bad ki 18 ngut kiwei pat kiba jop ïa ka State level Inter-School Athletics Meet 2022, la ai ïa ki T3000, T 2000 bad T 2000 kito kiba ioh ïa ka Gold Medal, ka Silver Medal bad ka Bronze Medal.
U bah Kyrmen Shylla, MLA jong ka Khliehriat Constituency, ha kane ka sngi u la noh syniang T 5 lak tyngka sha ka ophis jong ka District Sport Officer East Jaiñtia Hills District khnang ba ka ophis kan dup thied ïa ki tiar ialehkai sport kaba na ka bynta ka jingbit jingbiang ki nongïaleh kai sport jong ka district.
La ong ruh, kum ka jingpynshlur ïa ki khynnah bad ki samla bad ruh ban kyntiew ïa ka kam ïalehkai sport, ka ophis u Deputy commissioner, ka la pynlong ia ka Sponsor-an-Athlete Prokram ha kaba la kyntu ïa ki Company, ki jaka pule (institution) ba kin iarap ban bei tyngka lem (sponsor) ban pynkhreh ïa kawei ka athelete bad la pynbna ba la lah ban ioh haduh 15 tylli ki ba la sponsor ba kynthup ka nohsyniang kaba na ka NETC, na u MLA ka thaiñ, u bah Kyrmen Shylla, na u Deputy Commissioner, u Abhlash Banarwal, Superintendent of Police Shri Jagpal Singh Dhanoa, IPS bad kiwei kiwei.
Kiba la ai jingkren ki kynthup u Kongsan, uba dei u myntri ka sorkar jylla, u bah Kyrmen Shulla bad u Deputy Commissioner East Jaiñtia Hills District, u Abhilash Banarwal,IAS, kiba la ïa don ryngkat lang ki kynthup u Superintendent of Police, u Jagpal Singh Dhanoa , IPS, u N.R singh, u Project Engineer NETC lem bad ki dkhot jong ka East Jaiñtia District Sports Association.
Haba kut jong ka prokram ka la don ka jingiakren ba markhmat hapdeng ki khynnah kiba leit ban ïa shim bynta ha kitei ki lympung bad ki ba la shah khot sngewbha, ha kaba ki khynnah ki la pynpaw ïa la ki jingeh ba ki iakynduh ha ka jingleit shim bynta jong ki sha kitei ki lympung.