Shah kem 3 ngut, kynthup u trai ka skul bad Warden Hostel ha ka jingjia ha Karnataka

Shillong, Lber 18: Laingut ki briew ba kynthup ïa u trai jong ka skul bad ka hostel warden ki la shah kem ha kaba bad ka jingjia ba pynngat bih ha ka jingbam jong ki khynnah kaba la jia ha jylla Karnataka kaba la lam ruh sha ka jingïap jong ki arngut ki khynnah skul na Meghalaya.
Ka kynhun ki ophisar na ka tnat Pule Puthi ki la poi ha kane ka jaka kaba la jia ha Mandya district jong ka Karnataka bad ba ki la khmih ïa ka jinglong jingman ha kane ka jaka.
Kane ka kynhun ka la kynduh ïa District Magistrate jong ka Mandya District bad kumjuh ruh ki la leit jngoh ïa ka hospital kaba la sumar ïa ki khynnah skul kiba dei na Meghalaya.
Ki la leit jngoh ïa kane ka hostel ha kaba kane ka jingjia ka la jia bad ki la kynduh ruh ïa baroh kiba shitom. Kane ka kynhun kan sa aiti ïa ka kaiphod sha ka tnat Pule puthi.
U Commissioner & Secretary, Home (Police) Department u Bah Cyril Diengdoh u la poi ha kane ka jaka ba la synran lang da ki bor pynïaid district bad ki pulit ophisar.
Na ka liang u District Magistrate Dr Kumar u la batai ïa u ba ka jingtohkit ki pulit ka dang ïaid bad ki la ïathuh ruh ba ki la shah kem haduh 3 ngut ba kynthup ïa u trai ka skul bad ka hostel warden.
Na ka liang ki Medical Officer kiba la rangbah jong ka Hospital ki la donlang bad ki la ïathuh halor ka jinglong jingman halor ki khynnah skul na Meghalaya.
Ka long kaba sngewsih ba sa uwei pat u khynnah uba la mynsaw bad uba la shitom jur ha kine ki sngi ba la dep bad uba la shah sumar da ki tiar kiba khambha u la khlad noh ha ka mied sngi nyngkong.
La ïathuh ba baroh ki 22 ngut ki khynnah pule na Meghalaya ki dang don hapdeng ka jinglong jingman kaba la khambiang bad ba la peitngor bha da ki doktor.