Shillong, Lber 11: U Lamphang ka ïingdorbar thaw aiñ u Thomas A Sangma ha ka sngi baar u la khang bad pynsangeh ïa ka motion ba la wanrah da u nongïalam ka liang pyrshah u Mukul Sangma ban ïatai halor ka jingeh ba la mad da ki nongshong shnong ka jylla na ka daw jong ka jingbun palat ka dheng kali ha kaba kane ka dei ruh na ka bynta ban ïada ïa ki nongshong shnong ha kaba ïa kane la shim khia ruh da ka ïing kashari.
Ïa kane ka rai jong u Lamphang ka dei ruh halor ka khubor bad ka shithi na Commissioner & Secretary sha u nongïalam ka liang pyrshah.
Haba wanrah ïa kane ka phang ha Assembly, u Mukul u la kyrpad ïa u Deputy Speaker Timothy D Shira ban shah ïa u ban wanrah ïa kane ka motion da kaba pyntreikam ïa ka Rule 132 of the Rules of Procedure and Conduct of Business naba kane kadei ka PIL kadei ruh halor ka jingjur palat ka dheng kali ha nongbah Shillong.
Hadien ba u Shira u la pynbna ïa ka rai ban ai lad ïa u Mukul ban wanrah ïa kane ka motion kaba la buh ruh mynta ka sngi na ka liang u Symbud Myntri Rangbah uba khmih ïa ka tnat Parliamentary Affairs u Bah Prestone Tynsong u la ïeng ban pyrshah ïa kane ka jingwanrah ïa ka motion.
Haba kyrshan ïa kane ka jingmut, na ka liang jong u Myntri Rangbah u Conrad K Sangma u la ong, “Kane ka dei ka kam kaba kongsan bha na ka bynta jong ngi bad ngi la ïakren ruh ïa kane la bunsien bad kadei ruh ka kam kaba ngi hap ban ïakren hynrei na ka liang jong u Lamphang u la shim ka rai ba um lah ban shah ïa kane ka kam ban ïatai.
Hadien ba la sngap ïa baroh ki jingïatai na ka liang jong u Symbud Lamphang u la shim ka rai ban ym shah ban ïatai ïa kane ka phang. “Nga kwah ban wanrah ïa ka jingpyntip sha u LO ba ka rule 26 sub rule 3 kane kadei kaba khlem kynthup ha ka business jong ka thup ki jingïakren.”
U la ong ruh ba u nongïalam ka liang pyrshah u lah ban aiti ïa kane phang ha kawei pat ka session hynrei ïa mynta ka sngi yn ym lah ban shah ïatai.
Na ka liang jong u Mukul u la ai khublei ïa u Shira haba ïadei bad kane ka jingshim rai da kaba ong, “Ngan jin da la ai khublei ba lada ïa kane ka mat la lah ban shim ha ka por kaba biang.
