Shillong, Lber 11: U Myntri uba khmih ïa ka tnat Housing u Marcuise N Marak ha ka sngi baar u la ong ba ka tnat kan ïai bteng ban pynïoh ïa ki tin sop ïing kiba biang na ka bynta ban kyntiew ïa ki longïing bad ka jingim jong ki briew kiba duk ba kyrduh ha ki thaiñ nongkyndong.
Haba jubab ïa ka jingkylli hapoh ka ïingdorbar thaw aiñ ka jylla ha kaba ïadei bad ka Chief Minister’s Housing Assistance Programme (CMHAP), u Marak u la ong ba ka tnat ha kane ka khyllipmat ka la pyrshang katba lah ban sngewthuh ïa ki jingeh ka ban wanrah ïa ki lad ki lynti kiba biang na ka bynta ban pyntreikam ïa ki jingmut bad ban kyntiew ruh ïa ki kam ha kaba ïadei bad kane ka bynta.
“Ka tnat ka la pynkhreh ïalade bad ka la plie ka lad ka lynti na ka bynta ki jingmut kiba thymmai khnang ba kan lah ban kynjoh ïa ka thong, da kaba buh ruh ïa ka thong ban ïarap ïa ki briew kiba duk kiba kyrduh da kaba pynbiang ïa ki ïing kiba bha naba kane ka dei ka kam jong ka sorkar ban kyntiew ïa ka jingim jong kiba duk ba kyrduh,” u la ong da kaba bynrap, “Na ka jingkylla ka por, ka tnat ka la pynkhreh ban wanrah ka jingkylla da ka jingdonkam jong ka por ha kaba ïadei bad ki kam ban pynneh pynsah na ka bynta ka jingmyntoi jong ki nongshong shnong. Nga kyrmen ba kine ki kam lyngba ka Housing Department kan ai ka jingmyntoi ïa ki paidbah kiba sah ha sor bad nongkyndong.”
Na ka liang jong u Myntri u la pynkynmaw ruh ba ka tnat ka la pyntreikam ïa ka Rural Housing Scheme (RHS) ha kaba na kane ka skhim la ai lai ban ki corrugated galvanised iron (CGI) sheet lyngba ka grant-in-aid sha kito ki briew ba kin lah ban shna ïa la ki jong ki ïing.
U la pyntip ruh ba ki la don haduh 71, 632 ngut kiba la ïoh jingmyntoi na ka RHS mynshwa.
Ha kawei pat ka liang u Myntri u la ong ba kane ka projek bad ka scheme kam long pat kaba ai jinghun naba tang khyndiat ngut kiba aplai bad ïa kaba la ai ruh sha ki district bapher bapher bad kane ka la ktah ïa kito kiba la ap da ki snem ban ïoh jingïarap lyngba kane ka scheme bad kumta la donkam ban kyntiew shuh shuh na ka daw jingdawa ba ka jingkiew ki longïing.
“Kumta na ka liang ka sorkar ka la rai ban pynsangeh noh ïa kane ka skhim bad ha ka jaka jong ka la wanrah da ka Chief Minister’s Housing Assistance Programme (CMHAP) ha ka jaka ka RHS. La wanrah ïa ka CMHAP ha ka snem 2017 bad la pyntreikam naduh ka snem 2017-18. Kane ka skhim ka kynthup na ka bynta ki longïing kiba sah ha nongkyndong bad ha sor ba la pyntreikam da ki C&RD block bad kumjuh ruh ha ki jaka sor bad kiba hap ha Municipal,” ïathuh u Marak.
U la ong ba ka jingthmu jong ka CMHAP ka long ban pynbiang ïa ki tin sop ïing sha ki longïing kiba kyrduh ne ki economically weaker section (EWS) da kaba ai lai ban ka tin sopïing sha kito ki loongïing kiba la shah jied kiba dei ruh na ka longïing low-income group (LIG) ne kiba duna ka ïoh ka kot ha kaba ka sorkar ka ai lyngba ka mang pisa kaba long T. 75000 hajar.
U Myntri u la ong ruh ba ïa mynta ka tnat ka ai tang ïa ki aluminium roofing sheet sha ki longïing kiba duk ne ki economically weaker section (EWS) kiba dei ban ïoh jingmyntoi ha ki C&RD Block bad ki jaka sor ne ki jaka Municipal.
U la ong ruh ba ïa mynta ka skhim kaba ar khlem pat lah ban pyntreikam. Hynrei ïa ka jingïarap pisa kaba long T. 75000 la dep ban ai sha ki longïing LIG kiba don haduh 130 ngut kiba ïoh jingmyntoi hapoh South West Garo Hills district ha ka snem 2017-18, 100 tylli ha Betasing C&RD block bad 30 tylli ha Damalgre C&RD block.
