Ujor u Dr. Ricky sha ka Sorkar Pdeng bym biang ka jingshna ïa ka surok NH-6 ha Narpuh

Khliehriat, Lber, 11: U MP ka Shillong Dr Ricky AJ.Syngkon ha ka sngi Baar u la phah ïa ka jingujor da ka jingthoh sha u Myntri ka Sorkar Pdeng uba khmih ïa ka Road Transports and Highways u Nitin Jairam Gadkariji ban pynpaw ïa ka jingbym biang ka rukom pyntrei ïa ka surok National Highway-6 ha Narpuh, East Jaiñtia Hills District nalor ba kane ka surok ka dei kaba pynïasoh bad kiwei pat ki jylla.
U Dr. Syngkon u la pynpaw ba u la phah pynlong ïa ka jingjurip bad dei lyngba ka video kumba paw ha ka jingjurip la lap ba ka surok ha ka shnong Kuliang ka pynpaw ba ka rukom siang rong ïa ka surok kam dda biang bha ha kaba ïa ka rong dang lah ban khlong da ka kti ruh bad kane ka paw ba ka rukom trei ka long kaba la shu pyntrei tang dep rukom da u kontraktor.
“Kaba kum kane ka jingpyntrei kam ym lah ban pynlong ïa ka surok ba kan neh khamtam ha kaba ïadei bad ka jinglong jingman jong ka suiñ bneng ha ka thaiñ bad ka rukom shna ïa ka surok ha ka thaiñ ka dei ban long kaba bniah, ba khlaiñ bha ba kan ym buh jingma ïa ki nongleit nongwan bad ba kan nym wanrah ïa ka jingduhnong bad jingjia ba sngewsih,” la ong u MP.
U Dr Syngkon u la kyntu ïa u Gadkari ba un tuklar kham kloi halor kane ka kam bad ban shim ïa ki lad ki lynti ban pynbeit ïa kane ka jingduna ha jingpyntrei ïa ka surok National Highway khnang ba ka surok kan long kaba neh bad kaba skhem bad ban pyn kloi ruh ïa ka jingpyntrei.
“Nga shaniah ha ka jingkut jingmut ba skhem jong phi ban pynlong ïa ka surok kaba bha, kaba bit ba biang, kaba neh bad nga ngeit ruh ba ka kam kan kloi ha kaba ïadei bad ka jingpyntrei ïa ka surok,” u la bynrap.