Ki jingbthah bad ka ïaid ka ïeng jong ki kali ha ka Jingïaseng KJP Synod Sepngi ha Sakwang
Mawkyrat, Lber, 07: Ka ophis jong u Superintendent of Police South West Khasi Hills District ka la pyntip halor ka ïaid ka ïeng jong ki kali kiba wan na kylleng ki jaka da ka jingthmu ban leit sha ka jingïaseng Khasi Jaiñtia Presbyterian Synod Sepngi kaba 23 ka ban long ha ka Balang Presbyterian Sakwang, South West Khasi Hills District kaba la sdang naduh ka 6 tarik haduh ka 9tarik, Lber, 2025.
La khmih lynti ba ki riewngeit na kylleng ka ri Khasi bad nabar jong ka kin sa ïa poi lang ha 9 tarik, Lber, 2025 na ka bynta ka Jingïaseng paidbah kaba dei ha ka Sngi u Blei. Kumta ban lait na ka jingdheng kali bad ban suk ka ïaid ka ïeng, na ka liang ka ophis ka la buh ryntih ïa ka rukom pynïaid kali da kaba ai jingtip ba kiba wan na Surok Shillong bad Umoid ka lynti ïaid kan dei na Jakrem – Lad Sakwang sha ITI ophis ha Sakwang bad ka jaka pynïeng kali kan dei ha Madan ïalehkai kynjatbol Mawmyrïong bad kiwei kiwei.
Kiba wan na ki thaiñ Ranikor ka lynti kan dei Rangthong – Nonglang – Mawkyrwat – Lad District Court – Pynden Sakwang bad ka jaka pynïeng kali kan dei ha Pyndenbah (Pyndensakwang) madan ïalehkai kynjatbol ha Pyndensakwang bad kiwei kiwei. Nangta, kiba wan na Nongstoiñ, Lawbyrtun bad Nongshilong kin ïaid ïa la lynti Pyndenmawthawiang -Jashiar – Sakwang bad ki jaka ïeng kali kin dei ha Pyndensakwang na ka bynta ki Sumo, Pickup bad Kali rit bad kiwei kiwei katba ki Bus bad Truck kin pynïeng ha ki jaka ba la pynbeit ha Sakwang.
Kiba wan na Phlangkynshi bad Mawkohphet kin ïaid ïa ka lynti Rangmaw – Lad Rangmaw – Pyndenumdoh bad ka jaka pynïeng kali pat kan dei ha Pyndenumdoh bad kiwei kiwei.
Lyngba kitei ki jingpynbeit na ka liang ka ophis u Superintendent jong ki Pulit ka South West Khasi Hills District ka buh ruh ka jingkyrpad lyngba ki mat ba donkam kata ki long ba ki nongñiah kali kin sngewbha ban kohnguh ïa ki jingkdew bad jingpynïaid jong ki Pulit Traffic ryngkat ki Volunteer ba la pynbeit kyrpang, ki nongñiah kali kim dei ban pynher stet ïa ki kali, kim dei ban pynïeng kali kulmar ne ban pynieng ha ki rud surok bad ynda ki la rung ha ki Area Mawkyrwat kim dei ban ïa beh ban ïaknieh ïaid shakhmat.
Lada don kano kano ka jingdonkam kyrkieh sngewbha ban pyntip sha ka Police Control Room ha u mobile number 8415886486 ba la buh kyrpang.