Kyndit thret ka DRKLS ba lap ba wan kam trai Lyngdoh Hima da u bah Ailadstar Nongrem
Mawkyrwat, Jylliew 14: Ka Dorbar Ri Khaiñ Lyngdoh Sakwang (DRKLS) ka pynpaw ka jingkyndit hadien ba la lap ïa ka jingwan kam trai ban long Lyngdoh Hima da u bah Ailadstar Nongrem na Jakrem ba la ruh ïa u kum u Vice Chairman ka Dorbar Shnong Jakrem, u babu bad Tymmen Basan ka Balang Presbyterian Jakrem ha kaba ma u bad ki 15 ngut ki nongbud kim dei hok ei ei ruh em ban wan tular.
Ha ka kyrwoh ba la phah da u bah I.P. Sohphoh, Adviser ka Ri Khaiñ Lyngdoh Sakwang, South West Khasi Hills District u la pynpaw ba ka Dorbar Khaiñ, ka la lap kumne; Ha ka 08.05.2021 u la leit pan jingbit na u Syiem Maharam ban long u Lyngdoh Hima jong ka Dorbar Shnong Sakwang bad ïa kane ka Dorbar Shnong Sakwang kam shah. Namar la dep thung ïa u Myntri, Secretary bad ki dkhot ka Dorbar. Haba la khot hajir halor kane, u la kubur ba u la bakla.
Ha ka 30.04.2021, u Syiem ula ai ka jingpynbna khot kyrteng ïa kiba dei hok ban thep kyrteng thung Lyngdoh Hima na ka Ri Khaiñ Sakwang, katba ka Dorhar Ri Khaiñ kam shym la ïoh kopy ïa katei ka jingpynbna, kumba ju leh ha ki por ba la leit.
U bah I.P. Sohphoh u la ong ruh ba ha ka 28.08.2021, u Syiem ula ai ka sanad ïa utei u Rangbah da ka hukum u Syiem, ryngkat ki iktiar ba un treikam kum u Lyngdoh Hima hapoh jong ka Ri Khaiñ Lyngdoh Sakwang. Kumno ka lah ban long, ha kaba ka Dorbar Ri Khaiñ ka la dep thung ïa u Chairman, Secretary bad ki dkhot ka Dorbar Khaiñ ban peit halor ki khyndew ki shyiap bad kiwei ki dustur kiba don hapoh jong ka, pynpaw u bah I.P. Sohphoh.
Nangta, shuh shuh u bah I.P. Sohphoh u la pynkynmaw ba ha ka 04.06.2022, haba ka Dorbar Khaiñ Sakwang ka la ïoh ïa ka kopy nokol na u Syiem, ka ka khot hajir ïa u bah Ailadstar Nongrem bad ula jubab da kaba tei pop ïa u Syiem, hynrei “ma u bad ki nongbud kim shym la kwah ban leh kumta la jubab u bah Ailadstar”.
U bah I.P. Sohphoh u la ong ruh ba kumban shu pynshai tiak halor ka Ri Khaiñ Lyngdoh Sakwang, kaba dei ka khyndew bah ri Nongtymmen, ka jait Nongrem na Sakwang kpoh ka Jon bad ka Phri ka jait Lyngkhei; Sakwang kpoh ka Brin bad ka Bren (mar ar kpoh) ym na ka kpoh jong utei u Rangbah bad ki nongbud jong u. Ha ka 14.05.1963, ki la wan aiti duh sha ki 8 jait na Sakwang kata Kharjahrin, Ramsiej, Sohphoh, Wartde, Nongrem. Lyngkhei, Kharwanniang had Syiemlieh, u la ong.
Shuh shuh ïa ka bor long trai, bor synshar, ka bor pynïaid ïa ka 12 Ana na ka shi tyngka ha ka dor T. 14,000/- biang, ha ka 18.09.1975, ki la wan aiti sa ïa ka bor kaba long 3 Ana, ha kitei ki juh ki jait ha ka dor T. 3900.81 peisa. Mynta ki 8 jait ki la bat ïa ka bor kaba long 15 Ana bad ka jait Lyngkhei Kpoh ka Brin ka dang bat ïa ka bar shi (1) Ana baroh ka long 16 Ana ne Shi tyngka. Katba mynta hapoh ka Ri Khaiñ ka la don ka jingïatreilang kawei ka buit kawei ka bor da ka 15 Ann bad shi Ann. Kiwei pat kim lah shuh ban dang wan tuklar ïa ka Ri Khaiñ lait tang da ka jingïasngewthuh lang da kitei ki 8 jait.
Kumta lada utei u ‘riew rangbah bad ki nongbud jong u kim leit law leit weng noh ïa ka kyrteng Ri Khaiñ Sakwang ha ka jingthoh jong ki, ka Dorbar Ri Khaiñ kam banse ban leit ujor noh sha ki bor ba ha khlieh, namar ki 8 jait kim kwah shuh ban dang shah teh mraw ha kiwei pat ha la ka khyndew ka shyiap bad kiwei, u la ong.