Haba thung ïa ki dieng ka ai jingmyntoi ym tang ïa u briew hynrei ïa ki jingthaw ba im baroh: Kitborlang

Mawkyrwat, Jylliew 14: Kum shibynta ban pynmih bujli bad ki jaka ba la shah tih ne shah pom noh ïa ki dieng ki siej da ka jingwan ne ïoh ïa ki katto katne ki kam pynroi, ka National People Party Youth Front (NPPYF) jong ka Warsanlyngdoh Area bad ka Langrin Area da ka mynsiem jong ka jingkitkhlieh ïa ka mei mariang sawdong sawkun ki la ïoh ban pynlong ïa ka prokram thung dieng ha phyllaw jong ka skul Pyndeng-Umjaraiñ Upper Primary School.
Ha kane ka sngi la ïashimbynta shitrhem naduh u State Youth President jong ka National People Party Youth Front (NPPYF), bah Kitborlang Nongrem, u MDC ka Rambrai Jyrngam, bah Bajop Pyngrope lem bad ki nongkitkam jong ka NPPYF Warsanlyngdoh Area kiba dang shu dep ban pynskhem ha kaba la ïoh ban thung haduh 50 tylli ei ei ki tynrai dieng.
Haba kren ha ka jingïalang ba lyngkot hadien ba la pyndep ïa ka jingthung dieng, u bah Kitborlang Nongrem u la ong ba kane ka jingthungdieng ne jingrakhe ïa ka sngi pynneh pynsah ïa ka mei mariang kam dei ban long tang ha ka 5 tarik u Jylliew hynrei ka dei ban long manla ka sngi bad khamtam eh ha une u bnai ba mynta lada ngi thung dieng ki lah ban im bad san kloi bha namar ka dang dei ka aïom thung. Namarkata, u la pynpaw ka jingaikhublei na ka bynta ka NPPYF jong ka Warsanlyngdoh Area kiba la pynbeit ban pynlong ïa kane ka prokram ba kyrpang ban leh ei ei na ka bynta ka mei mariang.
U la ong ruh ba u don ka jingkyrmen ba da kaba thung ïa kine ki dieng tynrai kin heh kin san ai ka jingtyngeh ïa ka khyndew. Kumta u la ai ka jingkyntu na ka bynta jong ki samla ba haba la dep ban thung ïa ki dieng ki da sumar sukher ïa kine ki dieng ba haba ngi wan pat ha kawei ka por ngin ïoh ba kine ki dieng ba la thung mynta ka sngi ki heh ki plung.
“Ka jingthung dieng ka long ka jingmyntoi na ka bynta ka jingthaw ba im baroh namar kumba la tip ba ki dieng ki kjit noh ïa ka lyer ba jahkhia ka carbon dioxide bad ki pynmih pat ïa ka lyer kaba khuid ka oxygen ba ki jingthaw ba im ki ring mynsiem khamtam eh u briew u pyndonkam”, ong u bah Kitborlang.
Namarkata, u la kyntu ïa ki para samla jong ka dong ka thaiñ ba kin ïa mih shakhmat ban sumar ïa kiei kiei kiba don sawdong jong ngi da kaba kiar na kaba pom pathar ïa ki dieng ki siej hynrei dei ban sumar bad pynneh pynsah ïa ki.
Katba ha ka jingkren jong u MDC ka Rymbrai Jyrngam, bah Bajop Pyngrope u la ong ba kum ki briew ki thrang bad ki donkam ïa ki kam pynroi bad haba ki wan ki kam pynroi ka jingjulor ïa ka mei mariang ruh ka don. Kumta ban pynmih bujli ïa kata ka jingshah pynjot ïa ki mariang kum ki dieng ki siej, na ka liang ki samla jong ka NPPYF ka la pynlong ka jingthung ïa ki tynrai dieng ha ki jaka ba la sdang syllen bad shah tih ne shah pom noh ki dieng. “Ai ba kane ka jingthung ïa kine ki dieng kan long ka jingïarap na ka bynta ka mariang sawdong sawkun bad kan long ruh ka jingkyrkhu bad jingmyntoi na ka bynta baroh kiba ring mynsiem ïa ka lyer kaba khuid”, ong u bah Bajop.