Shillong, Rymphang 18: Ka Meghalaya Energy Corporation Limited (MeECL) ka la rai ban pynkhuid noh ïa ka pisa kaba T. 560 klur ka pisa kaba dangsah kaba dei ban siew sha ka National Thermal Power Corporation Limited (NTPC) ha une u snem ban wan.
Katkum ki tyllong khubor la ïathuh ba ka tnat ha ka sngi baar ka la ong ba ka MeECL ka la lah ban pynbeit ïa kane ka kam kaba dang sah bad ki karkhana pynmih bording laitnoh ka NTPC.
“Ïa ka pisa kaba dangsah la lah ban pynduna na ka T. 664 klur sha ka T. 565 klur ha ki 20 tylli ki instalment, kaba dang hap ban siew. Ngi kyrmen ba ha u snem ban wan yn sa lah ban pyndep ïa kane ka jingsiew,” ki la ong.
Haba ong ba ka MeECL ka dang pyrshang ban pyndep ïa kine ki kam ka tnat ka dang pynkhlaiñ ïa kane ka tnat ha kaba ïadei bad ka hydel bad thermal power project ha ka ratio kaba 60:40 khnang ban lah ban ïarap ïa ki jingdawa kiba mih manla ka sngi ha ka jylla.
