Nongstoiñ, Rymphang 15: Ka jingdonkam dohkha ha West Khasi Hills ka jur bha, hynrei haduh mynta ha man la ki ïew ki hat haduh ki dukan ha ki nongkyndong, dang hap ban pyndap da ki dohkha kiba la shalan na shabar jylla. Haba phai ha ka kam ri dohkha bad ka jingdon jong ki pung ha poh ka distrik, ym lah ban len ba lada baroh kiba don ïa ki pung ri dohkha, ki dei kiba la pyntbit bad kiba la shemphang ha ka kamai kajih, ka West Khasi Hills ka lah ban dei kawei na ki distrik, kaba lah ban pynmih bun ki dohkha ban die ha ki ïew ki hat.
Haba phai ha ka kam ri dohkha ka Fisheries Department tnad treikam jong ka sorkar ka peit ïa kane ka bynta, imat ka tlot haduh katta katta bad kam don ruh ïa ki nongtrei kiba tbit ban peit ïa katei ka kam. Nalorkata ha ka jinglum jingtip jong u nongthoh khubor, la lap ba kito ki nongshong shnong kiba la ïoh jingïarap na ka sorkar ban shna ïa ki pung ri dohkha, ki ïoh jingmyntoi tang ha ka por ba ki don ki briew kiba wan shim wai ïa ki pung jong ki, na ka bynta ban pynglong ïa ka jingïakop khwai bad don ruh katto katne ki trai pung, kiba ïoh jingmyntoi da kaba shah ïa ki briew ba kin wan khwai bad ki shim ha ka dor shispah haduh arspah tyngka shi sngi uwei u rawon.
Haba phai ha ka jingdon ki pung hapoh ka distrik ym lah ban ong ba baroh ki dei kiba ïoh jingïarap na ka Fisheries Department, hynrei ki don ki pung kiba la shna da ka jingbei pisa jong ka NABARD bad ba la pyntrei da sorkar lynba ka ka Soil Conservation, DRDA bad kiwei kiwei. Nalor kitei ki pung ba la pyntrei da ka sorkar bad kiba la ïoh jingïarap na ka Fisheries, ki don ruh ki pung ba ki riew shimet kiba don ïa ki jaka kiba biang ki tyllong um ki shna hi, na ka bynta ban pynneh ïa ka um bad ban ri dohkha ha kajuh ka por.
Haba phai pat ha ka jingdon jong ki wah, ka West Khasi Hills ka distrik kaba don bun eh ki wah, kiba lada ki paitbah nongshong shnong ki ñiewkor bad sumar, da kaba khanglad bad pyrkhing ban pynïap pathar ïa ki doh kha doh pnat kum ka khang jar, wieh dawai bih, siat bom bad kiwei kiwei, ki ïew ki hat kin bun da ki dohkha ba la pynmih hi na ki pung bad ki wah kiba don hapoh ka distrik.
Kumta ka don kam ïa ka sorkar ba kan peit bniah ba ki nongtrei ha ka Fisheries Department, ki dei ban long ki briew kiba la tbit bha ha ka kam ri dohkha bad kumno ban ai jinghikai ïa ki nongshong shnong, kiba ka la ai jingïarap ha ka ban shna ïa ki pung.
Nalor kata ba katei ka tnad treikam kan shim khia ha kaban ai jingïarap ïa ki shnong ki thaw, kiba shim khia ha ka ban sumar ïa ki um ki wah na ka bynta ban pynneh pynsah ïa ki dohkha doh pnat bad baroh ki jingthaw kiba im ha poh um, khnang ba ki paitbah kin trei shitom bad shimkhia ha katei ka bynta.
