Khliehriat, Rymphang, 11: U President jong ka Jaiñtia National Council (JNC) u Bah Sambormi Lyngdoh u pynshai ba ka Save Jaiñtia Mission ka dei beit halor ka thong ban leit pynshai sha ki paidbah na ka bynta ban dawa ïa ki san tylli ki mat kumba la buh bad ki paidbah kim dei ban sngewthuh bakla namar kane kam don jingïadei eiei ruh bad kano kano ka seng saiñpyrthei.
“Ka JNC kaba la pynbna ïa ka Save Jaiñtia Mission ka la leit sha kiba bun ki jaka ha rilum Jaiñtia ban pynshai ïa ka nongrim ba la pynbna ïa kane ka mishon ha ka 14 tarik, Nohprah, 2024 na ka bynta ban pynbha ïa ka rilum Jaiñtia”ong u kyrwoh.
U President ka JNC u la ong shuh shuh, “ha kane ka jingïaid lynti jong ka seng ban ïalap paidbah ïa ka Save Jaiñtia Mission ka long kaba ïaid beit shakhmat ha ki jingmut babha hynrei sngewsih ba don kiba sngewthuh bakla ïa ka bad kaba kham sngewsih shuh shuh ka long ba don pat kiba shimkabu ban ïalam bakla ïa ki paidbah. Kane ka mishon kam dei ka mishon kaba shahliang ïa kano kano ka seng saiñpyrthei ne ka mishon ban pyrshah ïa kano kano ka party ne ki riewshimet hynrei ka dei beit halor ka thong bad jingthmu ban leit pynshai sha ki paidbah na ka bynta ka jingdawa ïa ki san tylli ki mat kumba la bsuh ha kane ka mishon.”
La ong shuh shuh ba ïa kane ka mishon ka seng kan sa sdang biang ïa ka jingïaid lynti ban pynshai paidbah ynda lahdep ka election MDC namarba ka seng hi kan nym shong kli kti tad haduh ba ka Sorkar kan da pynurlong ïa ki mat jingdawa.
Kum ban shu pynkynmaw ba ki san tylli ki mat jingdawa lyngba ka Save Jaiñtia Mission, ki long ban pynkhlaiñ ïa ka Jaiñtia Hills Autonomous District Council (JHADC), ban pynrung ïa ka ktien Jaiñtia ha ka State Anthem bad ha ka State Launguage Act, ban shna noh ïa ka polisi bathymmai ha kaba ïadei bad ka kam thungkam thungjam ha ki karkhana dewbilat, ban pynbeit noh ïa u pud u sam hapdeng ka rilum Jaiñtia bad ka Sorkar Assam da kaba pynshong nongrim ïa ka PRE 1951 Jaiñtia Hills Map, ban shna noh da ka Small Scale Coal Mining Policy ban pynmyntoi ïa ki paidbah.
