Pyntikna ka President IOA ba ka National Games ba 39 kan wan ha Meghalaya ha u snem 2027

Shillong, Rymphang 11 : Ka President jong ka Indian Olympic Association, ka PT Usha ha ka sngi Ba-ar ka la pynthikna lyngba ka shithi sha u Myntri Rangbah ka jylla u Conrad K Sangma ba ki la pdiang ïa ka jingtyrwa jong ka Meghalaya ban pynlong ïa ka National Games kaba 39 ha u snem 2027, ha kaba ïa kane ka lympung la buh ban pynlong ha u bnai Rymphang – Lber jong utei u snem.
Na ka liang u Myntri Rangbah ka jylla, Conrad K Sangma bad u Myntri ka tnad Sports ka sorkar jylla u Shakliar Warjri bad kiwei kin leit shim ïa ka lama jong ka National Games kum ka jylla kaban pynlong ïa kane ka lympung, ha ka jingïalang pynhap pyrda ïa ka National Games kaba 38 kaban long ha kane ka sngi Thohdieng ha Uttarakhand.
Dang ha ka sngi U Blei, u Myntri ka tnad Sports u la pynbna lypa da kaba pyntip ba ïa ka jingtyrwa jong ka sorkar jylla la pdiang da ka IOA bad da ka Sorkar Pdeng.
Ha ka jingpyllait khubor ha kane ka sngi Balang, u Myntri Rangbah u la ong, “Ka National Games ka dei ka dak jong ka jingthrang jong ka Ri ban kyntiew ïa ki kam ïalehkai. Ka long ka burom ïa ka Meghalaya ban ïoh pynlong ïa kane ka lympung bah bad ban ïohi ba ki samla jong ngi kin mih aireng lang da ka jingkmen ha kane ka Games!”
La sot ruh ïa ka ktien jong u Myntri, u ba la ong, “Ka Meghalaya ka la sakhi ïa ki jingkiew stet ha ka ki kam ialehkai bad mynta ka paw kum kawei naki jylla kiba sdang ban kiew lang kum kawei na ki jaka ba pynmih ïa ki nongïalehkai ba kynsai jong ka Ri. Ngi long kiba la pynkhreh ban pdiang sngewbha ïa ki nongïalehkai bad ki nongkyrshan sha Meghalaya ban mad ïa kiei kiei kiba phylla kiba ka jylla ka don ban ai.”
Ha ka jingshisha ka Meghalaya ka la dei ban ïoh pynlong ïa ka National Games ha u snem 2022 hynrei naka daw ka jingwan noh ka khlam COVID kumta la pynsangeh shwa. Hynrei naduh katei ka por ka sorkar Meghalaya ka la bteng ban pynbha bad pynbit pynbiang ïa ki jaka ïalehkai kum ka jingpynkhreh lypa ia kane ka lympung. Ka jingïoh jong ka jylla ban khur haduh san tylli ki takma na ka National Games kaba long mynta ha Uttarakhand ka la dei ka snem kaba nang ai jingkyrmen bad jingkmen shuh shuh ïa ka jylla haba ïadei bad ki kam ïalehkai.
Kumba long mynta, ka Jylla ka la pynkhreh lypa ban pdiang kumba 40 tylli ki jait jingïalehkai na ka bynta ka National Games kaban long ha utei u snem 2027.
La ïathuh ruh ba ka jylla mynta ka pynkhreh ban pynlong ïa kane ka lympung bah ha ki lai tylli ki nongbah jong ka jylla ba kynthup ha nongbah Shillong kata ha JN Sports Complex, ha nongbah Jowai kata ha Wahïajer Multipurpose Sports Complex bad ruh ha nongbah Tura kaba dei ka PA Sangma Sports Complex.
La antad ruh ba kin don haduh kumba 12,000 ngut ki nongïalehkai kiban wan shim bynta na kylleng ki bynta jong ka ri.