Kyrpad ka BJP Meghalaya ïa ka tnat Ïada ri ban tohkit ïa ka jingpynkiew khajna ka Cantonment

Shillong, Rymphang 10 : Ki nongmihkhmat jong ka BJP Meghalaya hapoh ka jingïalam u MLA ka BJP u Bah Sanbor Shullai, ha ryngkat ka jingsynran lang da u state president Rikman G Momin bad kiwei ki heh ka party ki la kynduh ïa u Myntri khynnah ka sorkar pdeng uba khmih ïa ka tnat Ïada ri ne Defence u Sanjay Seth ha ka 29 tarik u Kyllalyngkot ban pynpaw ha u shaphang ka jingkyntiew kynsan ïa ka khajna shimwai ha kaba kane ka jingleh ka la ktah ïa kiba shimwai ïa ki jaka napoh ka Shillong Cantonment.
Ha kane ka jingleit ïakynduh u Bah Shullai u la kyrpad ba ka Shillong Cantonment Board, kaba dang hab hapoh ka Directorate General of Defence Estate, ba kan dei ban pynlong ïa ka jingtohkit ïa kane ka kam ha kaba ïa ka STR la pynkiew ha ka snem 2009, ha kaba kane ka long ka jingpynkheiñ ïa ki kyndon ba la don hapoh ka 1937 CLAR.
Ki dor ba la pynkiew naduh ka snem, kynsan kynsan la sakhi ïa ka jingpynkiew biang ha ka snem 2009 ha kaba kane ka la ktah shibun ïa kiba sah ha katei ka jaka.
U Bah Shullai u la ong ba ka jingïakhun na ka bynta ka hok kan ïaibteng tat haduh ba la lah ban pynbeit ïa kane ka kam bad kaba dei ban long ruh sha ka liang ki nongshong shnong. Kane ka kynhun kaba la kynduh ruh ïa u Director General ka DGDE G.S Rajeswaran ka la pynpaw ba ïa kane ka kam dei ban shimrai kaba kham kloi.
U Bah Shullai u la ïathuh ruh ba un sa khot sngewbha ïa u Myntri Khynnah ka sorkar pdeng uba khmih ïa ka tnat Defence ha u bnai Ïaïong naba une u Myntri u la pynpaw ïa ka jingangnud jong u ban wan jngoh ïa ka nongbah Shillong.
“Ka BJP Meghalaya ka angnud ban ïarap ïa ki kam kiba ktah ïa ki riew paidbah ban pynthikna ba kan ym don ka jingleh shilliang hapdeng ki nongshong shnong jong ka municipal bad ki jaka ka cantonment ha kaba ïadei bad ki khajna. Wat hadien habud ruh ka BJP Meghalaya kan ïakhun na ka bynta kano kano ka jingpynkiew ba shaba palat ïa ki khajna, la ka long ha ka municipal ne ki jaka ka cantonment,” bynrap u Bah Shullai.