Ka Umïam Distillation bad ka CMJ Breweries ki karkhana ba ba hakhmat ba jur ka jingpynmih jaboh, kynnoh ki paidbah

Nongpoh, Rymphang 05: Tang hadien ka jingleit jurip bad ka jingkhang khyrdep jong ki ophisar ka tnad Meghalaya State Pollution Control Board (MSPCB) ïaki karkhana haka thaiñ Byrnihat, ki bun ki riew paidbah kila pynpaw ka jingsngewkmen hadien ka jingshimkhia jong ka MSPCB ban leit jurip bad khang khyrdep ïa katto katne tylli ki karkhana ha katei ka thaiñ, hynrei ha kawei pat ka liang ki riew paidbah kila pynpaw ruh ka jingsngewkhia hadien ba ki karkhana ba dei hok ban shah khang kim shym la mih kyrteng hynrei ka tnad MSPC kala leit ban khang pynban ïa kiwei ki karkhana.
Hadien ka jingleit khang jong ka tnad MSPCB ïaki katto katne ki karkhana bala kynnoh ba ki pynkheiñ aiñ, katto katne ki riew paidbah kila pynpaw ba kitei ki ophisar kim nud ban leh eiei ïaki karkhana kiba dei hok ban shah khang bad kumba sakhi da ki paidbah ka Umiam Distillation Pvt Ltd bad ka CMJ Breweries ki dei ki karkhana kiba pynthud bad jur ka jingpynmih jaboh ha katei ka thaiñ naduh ka tdem haduh ka jingpyntuid jaboh sha ki wah kaba la pynmih ruh ka jingsawa bad ka jingsma kaba shyrkhei ha katei ka thaiñ.
Katto katne ki riew paidbah naka thaiñ Byrnihat kila pynpaw ba ka ka tnad MSPCB ka la dei ban leit khang nyngkong ïaka Umiam Distilation Pvt ltd bad ka CMJ Breweries hynrei ka jingkhmih lynti jong ki paidbah kam shym la urlong namar ka tnad MSPCB kala leit ban khang pynban ïa kiwei ki karkhana katba kitei ki karkhana ba jur ka jingpynmih jaboh kim shym la mih kyrteng ban shah khang ne leh eiei.
“Ngi kiba shong ba sah hajan kitei ki karkhana ngi tip kham bha ka jingjynjar ba ki paidbah ki mad naduh ka jingsawa, ka jingpynmih tdem bad ka jingpyntuid jaboh sha ki wah, hynrei kaba sngewlyngngoh ba ki briew jong ka MSPCB kim nud ban leit sha kitei ki karkhana watla ki atoskhana ba ki pynmih tdem ki mih ruh ki jaboh ba iong ngaiñ bad kiba lang tylli tylli” la kynnoh ki riew paidbah haba kren bad u nongthoh khubor.
Namarkata kum ki paidbah kim hun satia ïa katei ka jingleit khang khyrdep jong ka tnad MSPCB hynrei ki kwah ba kitei ki 2 tylli ki karkhana kidei kiba hakhmat bad kiba dei hok ban shah khang namar ka jingpynthud ïaki paidbah bad kumjuh ka jingpynkheiñ aiñ.