Nongpoh, Rymphang 05: Sa tang da ki sngi ban poi noh sha kata ka election ban jied ïa ki nongmihkhmat sha ka ïing Dorbar thaw aiñ ka Khasi Hills Autonomous District Council (KHADC), u Bah Prestone Tynsong, u president ka State NPP party bad ruh kum u symbud myntri ka sorkar jylla mynta ka sngi u la hiar sha Ri Bhoi na ka bynta ban ïalap elekshon ha ki ar tylli ki jaka kata, ha Marmaiñ bad ha Umwang na ka bynta ka Kong Rona Khymdeit, ka kyrtong ka NPP na Nongpoh Constituency, ka nongsaid-aiñ bad ruh ka MDC barim kane ka Constituency.
La synran lang ruh ha kane ka sngi ïa u Bah Prestone Tynsong da u Bah Himalaya Shangpliang, u nongai ktien ka party NPP ha ka jylla, u Bah Clement Mawlong, President ka NPP ha Ri Bhoi, ka kong Rona Khymdeit kum ka kyrtong lem bad kiwei kiwei ki nongïalam ba hakhmat ka party NPP na Ri Bhoi.
Haba kren ha kane ka jingïalang ïalap elekshon, u Bah Prestone Tynsong, u la buh ka jingkyrpad ïa ki paidbah katei ka thaiñ bad ïa ki paidbah ka Nongpoh Constituency hi baroh kawei ban kyrshan ïa ka Kong Rona Khymdeit ha kane ka elekshon MDC kum ka longkmie kaba la ih bha ha ka kam bad lada ki paidbah ki pynjop ïa ka Kong Rona Khymdeit kan pynsuk ruh ïa ki ban ïa trei kam naduh na Nongpoh shaduh sha Secretariat, Shillong.
Ha kane ka sngi, haba pan jingkyrshan na ki paidbah ban pynjop ïa ka Kong Rona Khymdeit, u Bah Pestone Tynsong, u la kular ruh ba tang shu dep ka elekshon MDC kin sdang noh ïa ka surok na Nongpoh sha Umden bad na Umden sha Byrnihat bad u la pynpaw ruh ba ka daw kaba ym pat lah ban sdang ïa kane ka surok, ka dei ka jingdon jong ka elekshon MDC ha KHADC bad JHADC.
U la kren ruh halor shibun ki bynta, ba ka sorkar NPP kan thaw ïa ki lad ki lynti ban kyntiew ïa ki nongrep bad kumjuh ruh ban wan rah noh ïa kata ka Apex cooperative Society, kiba dei ka jingïarap kyrpang ym tang ïa ki riew kynthei kumba long ha ki SHG bad Village Organization ban kyntiew ïa ka ioh ka kot ki longkmie bad ha kawei ka bynta ka sorkar ka la thaw ruh ka lad ban buh sa ïa kata ka SHG na ka bynta ki shynrang kiba long ki lad jingïarap ba kin thaw ïa ki lad ki lynti ban trei ban ktah na ka bynta ban kyntiew ïa a ioh ka kot jong ki hapoh ka jylla.
Shuh shuh, u la kren ruh ha ki bynta bapher bapher ba ka sorkar NPP kan pyntreikam na ka bynta ka jingmyntoi ki paidbah bad ha kawei ka bynta u la ai mynsiem ruh ïa ka Kong Rona Khymdeit kum ka kyrtong NPP ba ha ki elekshon ba la dep ki ju wan ha ka kyrdan kaba ar bad ha kane ka kynti pat kan sa poi sha ka thong jong ka jingjop lyngba ka jingkyrshan ki paidbah kiba sngewthuh ba ki donkam ïa kata ka party kaba don ha ka bor ban wan tuid ki kam pynroi, u la bynrap.
