Nongpoh, Rymphang, 02: Ha ryngkat u Tymmen U San ka Seng Khasi Kmie lem bad ki paid ka Bri u Hynñiewtrep Hynñiaw Wasa ha ka sngi u Blei la pynlong ïa ka jingkiew pyneh rngiew kaba 26 sha kliar u Lum Kyntang u Sohpetbneng bad kaba ïa tyngkhuh ruh ïa ka jingrakhe lehmen ka jingdap 125 snem ka Seng Khasi Kmie, Mawkhar Shillong, ha kaba ïa ka jingleh niam la sdang naduh ka khyrdop na trai u Lum Sohphetbneng bad pyndep ïa ka kñia ka khriam ha ka duwan dupat u lum Sohpetbeng.
Kumba ju long manla u snem, ka Seng Khasi Kmie shwa ban kiew pyneh rngiew sha u lum Sohpetbneng, ka Lum Sohpet Bneng Committee bad ka Committee U Tymmen u San ka seng Khasi Kmie, ki la pyndep shuwa da ka nguh ka dem, ka shat ka kheiñ, ka kñia ka khriam ha ki 3 tylli ki jaka, kata ha u Lum Dorbar ha Lawnongthroh, ha ka Mei Mawbuh bad ki sa pynkut pat ïa ka lehniam ha ka duwan ka dupat mynta ka sngi ha u Lum Sohpetbeng.
Kumba la sakhi ruh mynta ka sngi, ha kane ka jingkiew pyneh rngiew kaba 26, ka da long shisha kaba iphuh iphieng bad kaba da shongkun shong Blei da ka jingwan ban ïashim bynta ryntih da u paid ka Bri U Hynñiewtrep Hynñiew Skum u Hynñiaw Wasa bad kynthup ruh na kiwei ki jylla bad na ka ri bad na shabar ka ri.
Kaba kham shunkun shong blei shuh shuh, ka dei ha ka duwan ka dupat, ba u riew tymmen u riew san, u la shim bynta ban pyndep ïa ka nguh ka dem lyngba u khaw bad ka um ban suit ban shor ban pynsum pynsleh ïa ka duwan ka dupat ka dak ban pynkyntang pat ïa ka.
Kumba la pynpaw da u Bah Skor Jala, Chairman Riew Tymmen U san Seng Khasi Kmie bad u Bah Dipshon L. Nongbri, Vice President Seng Khasi Kmie, la ong ba kane ka dei ka jingkiew pyneh rngiew kaba 26, ha kaba kane ka jingkiew pyneh rngiew ka long kaba shonkun shong blei ba kat dang mih ki snem ka dang phuh dang phieng bad la donkam ban pyrkhat kyrpang ruh ba kane ka jingkiew pyneh rngiew ha u Lum Sohpetbeng la donkam ruh ban pynlong noh baroh shi taiew.
U Bah Skor Jala, u la pynpaw ruh ba ha kane ka sngi ym dei shuh tang u paid ka Bri u Hynñewtrep u hynñiew skum ba la wan ban shim bynta bad la don ruh kiba wan na kiwei ki jylla ba marjan bad wat na shabar ka ri, ban sakhi ïa kane ka lehniam ka leh rukom kaba ki ai kata ka nguh ka dep ïa ryngkew u basa khnang ban wan ka bha ka miat ha une u snem 2025.
Ki la pynpaw ruh ba kane ka jingkiew sha u Lum Sohpetbneg, ka long ban pyneh rngiew ïa ka bok ka nusip bad ïa bha ïa miat bad kahtam ki khun Khasi, namar kane ka jingleh niam kam dei tang kata ka jingïalap niam, hynrei ban pyni da ka kam (Seen is believing), kaba ki la leh da ka niam ka rukom ha ka duwan ka dupat ha kliar u Lum Sohpetbeng.
U Bah Skor Jala, u la ong ba ha kaba sdang ïa kane ka lehniam ki dang ïa don khrui tang khyndiat, hynrei katba dang mih ki sngi, kane ka jingkiew pyneh rngiew ka la dang shonkun bad ka la dang heh da ka jingwan shim bynta ki paid byllien bad kum ka seng Khasi Kmie kan sa dang pynkhat shuh shuh ban dang pynjanai shuh ïa kane ka leh niam ha ki snem bad ki por ban sa wan, kaba long shi bynta ban pyneh ïa kane ka lehniam ka leh rukom kaba ki ai ka nguh ka dem ïa ryngkew u basa ba un long u nongri nongda kumba ki la pynpaw ha ka lehniam ha ka duwan dupat u Lum Sohpetbeng.
