Ki paidbah dei ki Syiem hynrei ki nongmihkhmat ki dei ki nongshakri: A.A Shullai

Jowai Rymphang 01: U kyrtong ka VPP na North Jowai u ma Awhai Andrew Shullai haka jingkren sha ki lad pathai khubor mynta ka sngi 1 tarik u Rymphang, 2025 hadien bala dep ban thep kyrteng ïalade ha ophis u Deputy Commissioner Jowai, ula ong haka Election “ki paidbah ki long ki Syiem, katba ki nongmihkhmat ki dei ki Nongshakri”.
Hynrei mynta kiba bun na ki paidbah kila shah ïalam bakla da kaba shah pynbeit tang hapoh ki ar ne lai bnai jong ka Election, hynrei naduh bala mih pyrthei ka Party VPP ka jingkylla kala wan biang ryngkat ki nongrim jong ka bad kine ki nongrim ka VPP kila ïahap bad ki jingmut jong nga, namar naduh ki por mynshwa ka nongrim jong ka jaitbynriew ka long kaba tip briew tip blei, ong u ma Awhai Andrew Shullai.
Shuh shuh ula pynsngew, haoid ha kine ki Election bala dep ula kum bakla ban rung kyrkieh sha kiwei pat ki party kiba pher ka rukom treikam bad ka nongrim bad kane kala buh jingeh ïa u ban ïaid lynti kum u nongïalam haka liang pyrshah hapoh ka District Council.
Ula pynpaw ka jingïaroh ïa ka VPP kaba dei tang maka ka seng saiñ pyrthei kaba nyngkong ban ïoh pynïeng kyrtong ha baroh ki Constituency hapoh ka JHADC bad ka Party ka don jingkyrmen skhem ban ïoh ïa ka majority da kaba jop haduh 15 ngut shaneng ki MDC ha kane ka Election.
Ka rukom ïalap election mynta kala ïapher bha ong u ma Shullai bad ym donkam shuh ban pynbor ïa ki paidbah nongthep vote bad ka bor ka shnong ha ki paidbah ban shim ïa ka rai kaba khadduh ïano yn jied ïa u kyrtong u ban shakri hok ïa Ri bad ka jaitbynriew.
U la ong ka jingmih jong ka Jowai North kam dei ka jingjah jong ka Central Constituency kaba rim namar baroh ki shnong ki dang neh kumjuh hapoh ka Jowai North Constituency.