Ka jingtieng ïa U Blei dei ka jingsdang jong ka jingstad, ong u Bah Ransom Sutnga

By Mawphor Editor On Feb 1, 2025

Shillong, K’ Lyngkot 31: Da ki hajar ngut ki paidbah kiba dei na ka kur Sutnga ki la wan tuid sha ka Dorbar Pyllun kaba 12 ka Sein Kur Sutnga-14 Khrong Khasi Jaiñtia kaba la long ha ka 30-1-2025 ha ka Shnong Mookyndeng.
Ha kane ka Dorbar kur kaba la sakhi da ka jingwan jong ki byllien ngut la wan ban ïashim bynta na ki unit ki bapher bapher jong ka Kur Sutnga 14 Khrong ha kaba la ïadonlang U Bah Ransom Sutnga, Co Chairman MIDC kum u kongsan, Bah Bankupar Sutnga, President ka Kur, Bah Albinus Saio, Vice President ka Kur, Ma Hunmon Sutnga, General Secretary ka Kur bad ki nongkitkam ka Central Body jong ka Kur.
La sdang ïa kane ka jingïalang da ka jingkyntiew ïa ka lama jong ka Kur da u Ma Albinus Saio, Vice President ka Kur bad ka jingduwai sdang da u Rev R.K Sutnga.
Ha ka jingïalang la ïoh ban ïakren shibun ki kam ha kaba ïadei bad ka Kur bad la ïoh ruh ban pynthymmai ïa ki nongkitkam ka kur hapoh ka jingïalam u President ba thymmai Ma Albinus Saio. La shim ruh ïa ka rai ban tei noh ïa ka ïing kur ha Sutnga ha ka jaka ba la ai sngewbha da ka Sutnga unit jong ka kur.
Ha kane ka jingïalang la ïoh ka jingkren na u kongsan u ba la kyntu ïa ki paid ka kur Sutnga 14 khrong ban long barabor kiba sngewrit bad kiba sheptieng ïa U Blei nongbuh nongthaw namar ka jingsheptieng ïa U Blei kadei ka jingsdang jong ka jingstad. U la kyntu ruh ban long kiba trei shitom lada ka dei ha ki kam ki jam bad ha kano kano ka bynta ka jingim khamtam kiba ïadei bad ka jingdonkam ha ka imlang sahlang bad kiwei ki kam ïatei.
Ha kane ka jingïalang la shim ruh ïa ka rai ba ka Dorbar Pyllun jong ka kur Sutnga 14 khrong ka ban wan kan long ha ka snem 2027 ha ka shnong Shangpung.
La ïoh ruh ka jingkren ai khublei na ka liang ka kur da u Ma H. Sutnga, General Secretary bad na ka unit Mookyndeng da i Kong T. Sutnga bad la don ruh ki prokram bapher bapher ban pynbyrnia ïa kane ka jingïalang jong ka kur Sutnga.
La pynkut ïa ka jingïalang da kaba pynhiar noh ïa lama kur da u kongsan Bah Ransom Sutnga bad ka jingduwai pynwai da u Rev Dr E. M. C. H Shadap Passah.