Mawkyrwat, Jylliew, 12: Ha ka sngi saitjaiñ jong ka taïew ka 11 tarik u Jylliew, 2022, u bah Renikton Lyngdoh Tongkhar, u Nongmihkhmat jong ka Mawkyrwat Constituency ha ryngkat ka Hynñiewtrep Youth Council (HYC) jong ka Mawkyrwat Circle ki la ïoh ban aiti ïa ki tiar ba ki mistery kin ïoh ban pyndonkam ha kaba trei ïa ki kam jong ki kaba manla ka sngi.
Ïa kane ka jingsam ïa ki tiar mistery la mang lyngba ka MLA’s Scheme ïa kaba ka HYC hadien ka jingpynsngew jong ki samla ba ki ïa kynduh jingeh bad ha don hapdeng ka jingkyrduh kam kyrduh jam ha kine ki ar snem na ka daw jong ka jingwan lyngshop jong u COVID-19. Kumta seng ka khlem pynslem bad mar mar ka la leit ban pynsngew ha khmat jong u MLA bad na ka liang jong u ruh u la leh ïa kaba donkam bad mang kyrpang na ka bynta jong ki bad mynta ka sngi u la ïoh ban sam ïa sha ki 50 ngut ha kaba la pynlong ïa kane ka prokram Community Hall Mawkyrwat.
U Bah Renikton Lyngdoh Tongkhar ha ka jingkren jong u kum u kongsan ha ka jingïalang ba lyngkot, u la pynpaw ka jingsngewnguh bad ai khublei kyrpang ïa ka Hynñiewtrep Youth Council (HYC) jong ka Mawkyrwat Circle ba ka la lam lynti ban ïarap lem na ka bynta ki samla bad ban kyntiew lem ha ka ïoh ka kot ha ka kam sengkam sengjam lajong ïa ki samla jong ka ïa ka ri bad ka jaidbynriew kiba im ja ha ka kam bylla mistery ba na ka liang ka HYC ki la pynsngew ha u kum u nongmihkhmat ban ïarap lem na ka bynta jong ki.
Kumta na ka liang jong u, u la sngew dei ban ai ka jingïarap da kaba u la mang kyrpang na ka MLA Scheme kaba kot haduh T. 5/- lak tyngka na ka bynta ki 50 ngut ki nongïoh bynta. U kyrmen skhem ruh ba ki samla kiba la ïoh pdiang ïa kine ki tiar kin pyndonkam hok ïa ki khnang ba kan long ka jingmyntoi shibun ïa kiba kumno ba kin sdang ban seng ïa ki kam ban kyrshan ban ïeng ha la ki jong ki kjat.
U Bah Renik u la kyntu namarkata, ruh ba kum ki samla ba lyngba kine ki tiar kan pynshlur bad ai mynsiem ïa ki ban long kum ki mistery kiba trei hok bad trei shitom bad kim dei eh ban ap khmih lynti tang ïa ka kam sorkar hynrei ki dei ban wad ki lad ki lynti kumno ban sdang ïa ki lajong bad ban ïeng ha la ki jong ki kjat da kaba sdang ban seng ïa ki kam lajong ban shna ki jingshna kiba bunjait bad kan long ka jingïarap ïa ki hi ïa kito ki briew kiba thrang shisha ban trei lyngba kane ka kam mistery. “Nangne shakhmat kin sa mih shibun ki nongtrei mistery kiba tbit bad kiba trei bniah bad ba kan long ka jingmyntoi ïa ki hi bad ïa ki paidbah jong ka thaiñ baroh kawei”, ong u bah Renik.
