Nongpoh, K’Lyngkot, 22: Hadien ka jingmih noh u Bah Victor Ranee, MDC ka Jirang Constituency na ka party NPP ban pynïasoh ïalade sha ka seng Congress bad ban long ruh u kyrtong ha kane ka elekshon MDC ba mynta, ki nongkyrshan na ka thaiñ khappud jong ka Jirang Constituency kiba ju don bad u Bah Victor Ranee ha ka party NPP bad kiwei kiwei ki party ba kynthup na ka TMC, UDP mynta ka sngi ki la pynïasoh ïalade bad ka seng Congress ban pynkhlaiñ ïa ka party shuwa ka elekshon MDC.
Ïa kitei ki nongkyrshan na kiwei ki party la pdiang burom da ki nongïalam ka seng Congress da u Bah MG Kharshanlor President ka Ri-Bhoi District Congress Committee ha ka jingdonlang u Bah Victor Ranee kyrtong MDC ka party Congress, Bah Adrian L Mylliem Adviser, Bah Phrangsngi Syngkli President ka Jirang Block bad kiwei kiwei ki nongïalam ka seng Congress na ka thaiñ Jirang, ha ka jingïalang kaba la long ha Patharkhmah.
Na ka liang ki nongïalam ka seng Congress ki la pdiang burom bad pynpaw ka jingsngewkmen kaba khraw halor ka jingwan pynïasoh jong ki nongïalam bad ki nongkyrshan ba kiwei ki party sha ka seng congress ban nang pynkhlaiñ ïa ka party shuwa kane ka elekshon MDC namar ka seng Congress ka don ka jingkyrmen ba skhem ba u kyrtong un jop ha kane ka elekshon ba mynta.
Ki la ong ruh ba ka seng Congress ka dei ka party kaba trei na ka bynta u duk u suk bad dei ka party Congress kaba la wanrah ïa ka Autonomous District Council ban ïada ïa ka khyndew ka shyiap bad bun na ki paidbah bad kiwei kiwei ki party ki sdang ban kam bad sngewthuh bakla, lada jin ka party Congress kam don, ngim tharai ban don ka elekshon MDC la ong ki nongïalam.
Ki la ther tyngeh ruh ïa ka party NPP kaba la pyrshang ban wanrah ïa ka aiñ Meghalaya State Investment Promotion and Facilitation Act, 2024 kaba dei ka aiñ Iakjakor ban iuhroit ïa ka riti dustur bad ka riti bat khyndew ban pynkupbor bad pynmyntoi ïa ki katto katne ngut.
