Plie u Conrad ïa ka ophis treikam ka Hima Mawphlang ha Lumkynrew Mawïong
Pynbna 25 klur tyngka ban tei Tourism Centre hajan Law Kyntang

Shillong, K’lyngkot, 22: U Myntri Rangbah ka Jylla Conrad K. Sangma ha ka sngi Balang u la plie paidbah ïa ka ophis treikam jong ka Hima Mawphlang ha Lumrynkew Mawiong, Mawphlang, East Khasi Hills District.
Haba kren kum u Kongsan, u Myntri Rangbah u la ong ba kane ka sngi kan long ka sngi sah jingkynmaw namarba ka Hima kaba pynneh pynsah ïa ka riti ka durtur kan ïoh ïa la ka jong ka ophis treikam hadien shi hajar snem.
U la kular ba un sa mang pisa na ka bynta ban shna shuh shuh ïa ki jingdonkam jong kane ka ophis jong ka Hima bad ha kajuh ka por u la pynbna ruh ban sa mang pisa T. 25 klur lyngba ka Swadesh Darshan Scheme na ka bynta ban shna ïa ka Tourism Center bad ka Infrastructure Development ban tei ha Lawkyntang Mawphlang kaba ju khring bha ïa ki nongjngohkai pyrthei napoh ka ri bad nabar ka ri India.
U Myntri Rangbah u la pynbna ruh ba ïa ki post jong ki nonghikai ladep mang na ka bynta ka Mawphlang Science & Commercial College ha kaba ka jingshim klas kan sa sdang noh naduh une u snem.
U Myntri Rangbah u la pynbna ruh ban mang pisa T. 1 lak na ka bynta ka Mawphlang Secondary School bad sa T. 1 lak na ka bynta ka kynhun u Bah Pynshailang Lyngdoh ban ïoh thied ïa ki tiar tem tiar put.
Shuh shuh u la ruh ba un sa ai ïa ka CM Research Grant na ka bynta ka jingleh ïa ka jingwad bniah hapoh ka Hima Mawphlang.